د شهید مېجر محمد انور کاکړ لومړۍ تلین ونمانځل شو، د ۱۲ قول اردو قوماندان یې له کورنۍ سره ولیدل

کوټه(ویب نیوز) د شهید مېجر محمد انور کاکړ د لومړۍ کلیزې په مناسبت د ۱۲ قول اردو قوماندان لفټننټ جنرال راحت نسیم احمد خان د شهید له کورنۍ سره لیدنه وکړه، فاتحه یې وکړه او د هغه ستره قرباني، زړورتیا او وطن‌پالنه یې وستایله. نوموړي وویل چې د بلوچستان دغه زړور زوی د هېواد د سولې او دفاع لپاره خپل ژوند قربان کړ او تلپاتې ویاړ یې خپل کړ. هغه زیاته کړه چې ټول ملت د خپلو شهیدانو د قربانیو پوروړی دی او پاک پوځ به هېڅکله د شهیدانو کورنۍ یوازې پرې نه ږدي، بلکې د هغوی هوساینه خپله ملي او اخلاقي دنده ګڼي. د مراسمو په پای کې د شهیدانو د لوړو درجو، د پاکستان د سولې، پرمختګ او ثبات لپاره ځانګړې دعا هم وشوه.