د زیارت او هنه اوړک پېښې د امنیتي ناکامۍ نښې دي پښتونخوا ملي عوامي ګوند

کوټه (ویب نیوز)د پښتونخوا ملي عوامي ګوند د جنوبي پښتونخوا صوبایي اجرائیه شورا د صوبایي مشر نصرالله خان زیري په مشرۍ غونډه کې په بلوچستان کې د امنیتي وضعیت په اړه ژوره اندېښنه څرګنده کړه او د زیارت، هنه اوړک او نورو وروستیو پېښو یې د حکومتي ناکامۍ بېلګې وبللې. په غونډه کې ویل شوي چې پر ملي لویو لارو د ناامنۍ، ترهګریزو بریدونو، ډزو او د خلکو د وژنو زیاتېدو ولس سخت اندېښمن کړی دی. ګډونوالو غوښتنه وکړه چې د زیارت، هنه اوړک او نورو پېښو خپلواکې، شفافې او بې‌طرفه پلټنې دې وشي، مسؤول کسان دې د قانون له مخې مجازات شي، ملي لویې لارې دې خوندي شي او د ترهګرو ډلو پر ضد دې بې‌توپیره عملیات ترسره شي. غونډې د وژل شویو کسانو درناوی هم وکړ او ژمنه یې وکړه چې ګوند به د سولې، ولسواکۍ، د قانون د حاکمیت او د خلکو د حقونو لپاره خپله سیاسي مبارزه روانه ساتي.