په بلوچستان کې دې سوله، د ولس باور او سیاسي ثبات ته لومړیتوب ورکړل شي، مولانا عبدالواسع

کوټه (ویب نیوز)د جمعیت علماء اسلام بلوچستان صوبایي امیر سناتور مولانا عبدالواسع ویلي، بلوچستان دا مهال د امن او نظم له پلوه له ډېر حساس وضعیت سره مخ دی، نو ځکه باید د سولې ټینګښت، د خلکو د سر او مال ساتنه، پر دولت د ولس د باور بېرته راژوندي کول او سیاسي ثبات ته تر ټولو لومړیتوب ورکړل شي. هغه وویل، د بلوچستان ستونزې بنسټیز ډول سیاسي دي او د هغو دوامدار حل د اساسي قانون واکمنۍ، مانا لرونکو خبرو اترو، ملي تفاهم، متقابل باور او سیاسي جوړجاړي کې نغښتی دی. نوموړي زیاته کړه چې وفاق باید د باور جوړونې عملي ګامونه پورته کړي، د صوبې د خلکو اساسي حقونه، پر طبیعي سرچینو حق، د کار زمینه او برابر پرمختیايي فرصتونه یقیني کړي، او د ماینز اینډ منرلز بل، د لیویز ځواک ادغام، د ضلعو او ډویژنونو جغرافیایي وېش، سرحدي سوداګرۍ او نورو مهمو موضوعاتو په اړه دې د ټولو سیاسي ګوندونو، قبایلي مشرانو، ټاکل شوو استازو او نورو اړوندو لورو له پراخې سلا وروسته پرېکړې وشي. هغه ټینګار وکړ چې جمعیت علماء اسلام د بلوچستان د مسئلې د سوله‌ییز او تلپاتې سیاسي حل لپاره د هرې مثبتې او مخلصانه هڅې ملاتړ کوي او د ټولو سیاسي او دولتي بنسټونو ګډه تګلاره د وخت اړتیا ده.