کوټه: د لویو لارو تړل، ناامني او کرنیز مالیات د بلوچستان کرنه له سخت بحران سره مخ کړې ده، د ځمکوالو اکشن کمېټه

کوټه(ویب نیوز)د ځمکوالو اکشن کمېټې ویلي، د لویو لارو تړل، ناامني، د اقلیمي بدلون اغېزې او د کرنیز عاید مالیې پلي کېدو د بلوچستان کرنیز سکتور له سخت بحران سره مخ کړی دی. د کمېټې د مشر او پخواني د صوبایي اسمبلۍ غړي ملک نصیر احمد شاهواني په مشرۍ غونډه کې ګډونوالو وویل چې پرله‌پسې وچکالي، د بارانونو بې‌نظمي، سخته ګرمي، ږلۍ، سېلابونه، د ځمکې لاندې اوبو کموالی، اوږده برېښنايي پرچاوۍ او د کرنیزو توکو د لګښتونو زیاتوالي کروندګر له سختو ستونزو سره مخ کړي دي. د دوی په وینا، د صوبې شاوخوا ۷۰ سلنه کرنه د تباهۍ له ګواښ سره مخ ده او د ناامنۍ، ګرځبندیز او د لویو لارو د تړل کېدو له امله فصلونه، مېوې او سبزيجات پر وخت بازارونو ته نه رسېږي. کمېټې له حکومته غوښتنه کړې چې کرنیز عاید مالیه دې وځنډول شي، لویې لارې دې پرانیستل شي، اغېزمنو کروندګرو ته دې ځانګړی مرستندوی پکېج ورکړل شي، د اوبو او انرژۍ اسانتیاوې دې برابرې شي او د کرنیزو پالیسیو په جوړولو کې دې د ځمکوالو د سازمانونو وړاندیزونو ته ځای ورکړل شي.