د بلوچستان عالي محکمې د کوټې د پرمختیايي پروژو او ټرافیک د تنظیم لپاره مهمې لارښوونې وکړې

کوټه (ویب نیوز)د بلوچستان عالي محکمې د کوټې د پرمختیايي پروژو، ټرافیکي نظام او ښاري اسانتیاوو په اړه مهم احکام صادر کړي دي. محکمې د ریلوې سټېشن څلورلارې اوسنی ټرافیکي سیستم پر خپل ځای د ساتلو، د زرغون سړک پر غاړه د ناقانونه تجاوزاتو، کیبنونو، موقتي دوکانونو او غیرقانوني پارکینګ د سمدستي لرې کولو، د اوبو ایستلو د نالیو د ساتنې او د سېف سټي پروژې له خوا د نوو سړکونو د بې اجازې کیندلو د مخنیوي امر کړی دی. همداراز، اړوندو ادارو ته د ټرافیک پولیسو د نفري پوره کولو، د سمنګلي سړک د پراختیا، د کویلې پهاټک د رېل پټلۍ د پراخولو او د عدالتي احکامو د ژر او اغېزمن پلي کولو سپارښتنه شوې ده.