د هنه اوړک د ځوان تر وژل کېدو وروسته وضعیت ترینګلی، د ایف سي مرکز او پولیسو مخې ته پرلت دوام لري

کوټه (ویب نیوز) د کوټې د هنه اوړک په سیمه کې د یوه ځوان د وژل کېدو له پېښې وروسته وضعیت یو ځل بیا ترینګلی شوی او د اوړک قبیلې غړو د هنه پولیس سټیشن او د فرنټیر کور (ایف سي) د مرکزي دفتر مخې ته احتجاجي پرلت پیل کړی دی. مظاهره‌چیان وایي، د اوړک سیمې اوسېدونکی ریاض کاکړ په ولي تنګي دوا رود سیمه کې وژل شوی، خو د پېښې له څو ساعتونو تېرېدو سره سره یې جسد لا هم کورنۍ ته نه دی سپارل شوی. احتجاج کوونکو غوښتنه کړې چې د ریاض کاکړ جسد دې سمدستي وارثانو ته وسپارل شي او د پېښې شفافې، بې‌طرفه او چټکې پلټنې دې وشي، څو مسؤل کسان د قانون منګولو ته وسپارل شي. د احتجاج له امله د هنه پولیس سټیشن او د ایف سي مرکز شاوخوا سخت امنیتي تدابیر نیول شوي او اضافي امنیتي ځواکونه ځای پر ځای شوي دي. مظاهره‌چیانو اعلان کړی چې تر هغو به خپل پرلت ته دوام ورکړي، څو د جسد سپارلو او د انصاف د تامین ډاډ ورنه کړل شي. تر وروستیو معلوماتو پورې د اړوندو چارواکو له لوري د پېښې په اړه رسمي دریځ نه و خپور شوی.