وزیراعظم د وفاقي وزارتونو او ډویژنونو د کړنو د هر اړخیزې ارزونې پرېکړه وکړه

اسلام‌آباد (وېب نیوز): وزیراعظم شهباز شریف د حکومت د ټولیز فعالیت د ارزونې لپاره له ټولو وفاقي وزارتونو او ډویژنونو څخه د ۲۰۲۴م کال د فبرورۍ راهیسې د خپلو کړنو، مهمو اقداماتو او لاسته راوړنو مفصل راپورونه غوښتي دي. د وزیراعظم دفتر د لارښوونو له مخې وزارتونه به د عامه خدمتونو د ښه والي، اداري اصلاحاتو، بشپړو او نیمګړو پروژو، د ځنډ لاملونو، لګښتونو د سپما او د حکومتي نظام د اصلاحاتو په اړه بشپړ معلومات وړاندې کوي. همدارنګه ټولو وزارتونو ته ویل شوي چې د خپلو ادعاوو لپاره مستند اسناد او د تصدیق وړ شواهد هم وسپاري، ځکه بې اسناده او نیمګړي راپورونه به ونه منل شي. په دې ارزونه کې به د پرمختیايي بودجې د مصرف، د سي پیک ادارې، پلاننګ کمېسیون، کلني پرمختیايي پروګرام، اقتصادي پالیسیو، سرشمېرنې، عامه او خصوصي مشارکت او د وزیراعظم د ځانګړو پروګرامونو د پایلو هم هر اړخیزه ارزونه وشي.