د بلوچستان د سوداګرو اتحادیه د اګست په ۷ او ۸مه د شټر ډاون هړتال اعلان پر ځای وساته

د غوښتنو د نه منلو په صورت کې به احتجاج ټول بلوچستان ته وغځول شي، رحیم اغا
کوټه (ویب نیوز) د بلوچستان د سوداګرو اتحادیې (رجسټرډ) مشر رحیم اغا اعلان کړی چې د سوداګرو له خوا د اګست په ۷ او ۸مه په کوټه کې د بشپړ شټر ډاون هړتال اعلان پر ځای پاتې دی او ټولې تیارۍ ورته بشپړې شوې دي. نوموړي وویل چې د کورنیو چارو صوبايي وزیر میر ضیاء الله لانګو ډاډ ورکړی و چې د بلوچستان د چیف سیکرټري په مشرۍ به غونډه ترسره کېږي، خو د بلوچستان اسمبلۍ د مصروفیتونو له امله خبرې اترې ترسره نه شوې. هغه وویل چې سوداګرو تل د خبرو اترو او تفاهم له لارې د ستونزو د حل هڅه کړې، خو د ژمنو د نه عملي کېدو او پرله پسې ځنډ له امله اوس د زغم حد ختم شوی دی. رحیم اغا دا څرګندونې د کوټې ښار د بېلابېلو بازارونو او سوداګریزو اتحادیو د مشرانو په غونډه کې وکړې. هغه وویل چې د سوداګرو ټولې غوښتنې قانوني او جائزې دي او حکومت باید ورته سمدستي پام وکړي. نوموړي خبرداری ورکړ چې که د اګست د ۷ او ۸مې هړتال وروسته هم حکومت د سوداګرو غوښتنې ونه مني او جدي مذاکرات ترسره نه کړي، نو احتجاج به یوازې تر کوټې محدود نه وي بلکې د بلوچستان په کچه به د بشپړ شټر ډاون هړتال اعلان وشي، چې ټول مسؤلیت به یې پر حکومت وي. هغه له ټولو سوداګرو، دوکاندارانو، کاروباریانو او صنعتکارانو وغوښتل چې د هړتال د بریالیتوب لپاره یووالی، نظم او همغږي وساتي، څو د سوداګرو غږ حکومت ته په مؤثره توګه ورسېږي او د هغوی جائز حقونه خوندي شي.