د تحریک تحفظ آئین پاکستان احتجاجونه؛ د عمران خان خوشې کېدل او د اساسي قانون بیا پلي کېدل د هېواد اړتیا وبلل شوه

کوټه(ویب نیوز) د تحریک تحفظ آئین پاکستان د مشر او د پښتونخوا ملي عوامي ګوند د رئیس محمود خان اڅکزي په غوښتنه د کوټې، پشین، چمن، قلعه عبدالله، قلعه سیف الله، ژوب، شیراني، موسیٰ خېل، لورالايي، زیارت، سبۍ، هرنایي او د هېواد په نورو سیمو کې احتجاجي غونډې او لاریونونه ترسره شول. ګډونوالو د عمران خان، علي وزیر، ماهرنګ بلوچ او نورو سیاسي بندیانو د خوشې کېدو، د اساسي قانون، ولسواکۍ، خپلواکې عدلیې، ازادو رسنیو او ولسي واکمنۍ د بیا بحالولو غوښتنې وکړې. ویناوالو وویل چې هېواد له سیاسي، اقتصادي او امنیتي بحرانونو سره مخ دی او د دغو ستونزو د حل لپاره د اساسي قانون بشپړ پلي کېدل، د پارلمان خپلواکي، د خلکو د رایې درناوی او سیاسي خبرې اترې اړینې دي. هغوی همداراز په بلوچستان او خیبر پښتونخوا کې د ناامنۍ پر زیاتېدو اندېښنه څرګنده کړه او ویې ویل چې د سولې او ثبات لپاره باید ټولې سیاسي او جمهوري ځواکونه په ګډه هڅې وکړي.