د بلوچستان ملي لویې لارې د وژنو او لوټمار مرکزونه ګرځېدلي، مولانا عبدالرحمن رفیق

کوټه(ویب نیوز) د جمعیت علماء اسلام کوټې ضلع مشر شیخ الحدیث مولانا عبدالرحمن رفیق، عمومي منشي حاجي عین الله شمس، لوړپوړي مرستیال مشر مولانا خورشید احمد او نورو مشرانو ویلي چې د بلوچستان ملي لویې لارې د وژنو او لوټمار پر مرکزونو بدلې شوې دي. هغوی وویل چې هره ورځ پر مسافرو د لوټ، د موټرو د تښتولو او د مقاومت په صورت کې د ډزو له لارې د خلکو د وژلو پېښې معمول ګرځېدلې دي. د ترهګرۍ د وېرې او د وسله والو ډاکوانو له امله د صوبې پر مهمو ملي لویو لارو سفر کول د خلکو لپاره له لوی خطر سره کم نه دي او ولس د حکومتي او امنیتي ادارو له فعالیتونو سخت ناهیلی شوی دی. د جمعیت علماء اسلام مشرانو وویل چې د ترهګرۍ، ډاکو او وسله والو جرمونو د پرله‌پسې زیاتېدو له امله مسافر د خپل سر او مال د خوندیتوب په اړه له سختې اندېښنې سره مخ دي. هغوی وویل چې ملي لویې لارې د هر هېواد په اقتصادي او ټولنیز نظام کې بنسټیز اهمیت لري، خو په بلوچستان کې پر دغو لارو د خلکو د امنیت نه تضمینول د حکومتي مسؤلیتونو په ترسره کولو کې ستره غفلت دی. دوی له حکومته غوښتنه وکړه چې د لویو لارو امنیت دې سمدستي اغېزمن کړي، د جرمي عناصرو پر وړاندې دې بې توپیره عملیات ترسره کړي او د مسافرو د سر او مال د خوندي کولو لپاره دې عملي او کلک اقدامات وکړي.