د ډبرو سکرو کانونه د مرګ پر کنډو بدل شوي، روان کال ۱۱۸ کان‌کېندونکي مړه شوي

کوټه (ویب نیوزډ)د پاکستان مرکزي ماینز لېبر فېډرېشن او آل پاکستان لېبر فېډرېشن د دُکي په معراج کول سیمه کې د ډبرو سکرو په کان کې د زهري ګاز د خپرېدو له امله د درېیو کان‌کېندونکو پر مړینه خواشیني څرګنده کړې او د پېښې د شفافو پلټنو، د مړو شویو کان‌کېندونکو کورنیو ته د بشپړ تاوان ورکولو او په کانونو کې د خوندیتوب او روغتیا اړوند قوانینو د عملي کولو غوښتنه یې کړې ده. د پاکستان مرکزي ماینز لېبر فېډرېشن مرکزي عمومي منشي سلطان محمد خان او د آل پاکستان لېبر فېډرېشن مرکزي عمومي منشي عبدالستار ویلي چې په پاکستان کې د ډبرو سکرو کانونه د کارګرانو لپاره د مرګ پر کنډو بدل شوي او د خوندیتوب د اسانتیاوو د نشتوالي له امله هر کال سلګونه کان‌کېندونکي مړه کېږي. دوی ویلي چې په کانونو کې پرله‌پسې پېښې د دې خبرې څرګند ثبوت دي چې د کان‌کېندونکو د روغتیا، خوندیتوب او ساتنې لپاره موجود قوانین نه عملي کېږي. د دوی په وینا، یوازې د روان کال په جولای او اګست میاشتو کې په بلوچستان کې له ۵۰ څخه زیات کان‌کېندونکي مړه شوي، په داسې حال کې چې په ټول هېواد کې له ۱۱۸ څخه زیات ماین کارکوونکي په بېلابېلو پېښو کې خپل ژوند له لاسه ورکړی دی. د کارګرانو اتحادیو له وفاقي او صوبايي حکومتونو غوښتنه کړې چې د کان‌کېندنې په برخه کې د نورو مرګونو د مخنیوي لپاره بېړني عملي اقدامات وکړي او د معدنیاتو اداره، د کارګرانو اداره، د ماینونو پلټونکي او د کانونو خاوندان خپلې دندې په سمه توګه ترسره کړي. دوی ویلي چې د مناسبو خوندیتوبي تدابیرو، د ګازونو څارنې، هوا رسونې، د کارګرانو روزنې، منظمې پلټنې، بېړنیو ژغورنیزو اسانتیاوو او د عصري وسایلو له لارې د کانونو د معاینې په صورت کې د قیمتي انساني ژوندونو ژغورل ممکن دي. دوی یو ځل بیا له وفاقي او صوبايي حکومتونو او د معدنیاتو له ادارې غوښتنه کړې چې په روان کال کې د کان‌کېندنې د پېښو خپلواکې، شفافې او بې پرې پلټنې وکړي، راپورونه یې خپاره کړي او د غفلت یا د خوندیتوب د قوانینو د سرغړونې مسؤل کسان معلوم او سختې سزاوې ورکړي. دوی همداراز له پاکستاني حکومته غوښتنه کړې چې د کان‌کېندنې په برخه کې د روغتیا او خوندیتوب په اړه د کار نړیوال سازمان (ILO) کنوانسیون ۱۷۶-C ژر تر ژره تصویب او عملي کړي، چې له دې سره به د کان‌کېندونکو د ژوند او روغتیا د ساتنې لپاره د پاکستان قانوني او ادارې چوکاټ پیاوړی شي.