واشنګټن(ویب نیوز) د امریکا پوځي قاضي لیفټیننټ کرنل مایکل شراما د ناین الیون بریدونو د مبینه مرکزي منصوبه جوړونکي خالد شیخ محمد هغه اعترافي بیانونه غیرقانوني وبلل چې نوموړي ایف بي آی ته ورکړي وو او د قضیې څخه یې خارج کړل. د امریکايي رسنیو د راپورونو له مخې قاضي ویلي چې څارنوالان په دې ثابتولو کې پاتې راغلي چې د خالد شیخ محمد بیانونه په خپله خوښه ورکړل شوي وو، په داسې حال کې چې محکمې د سي آی اې د مبینې رواني فشار او شکنجې دوام او د ایف بي آی چارواکو له خوا د تورن کس د قانوني حقونو نه خبرولو موضوع هم مهمه بللې ده. خالد شیخ محمد په 2003 کال کې په پاکستان کې نیول شوی و او د ناین الیون په قضیه کې د شکنجې له لارې ترلاسه شوو اعترافاتو د قانوني حیثیت په اړه له کلونو راهیسې قضايي جګړه روانه ده. د څلورو تورنو کسانو محاکمه په ګوانتانامو بې کې د 2028 کال د جون په 5مه نېټه ټاکل شوې، خو د څارنوالۍ له خوا د پرېکړې د اپیل په اړه د غور کولو امکان شته. د ناین الیون بریدونه د 2001 کال د سپتمبر په 11مه ترسره شوي وو او د دغې پېښې 25مه کلیزه رانږدې شوې ده.
