د جنوبي پښتونخوا جرګه نن په کوټه کې پیلېږي، د مهمو پرېکړو تمه

کوټه (ویب نیوز) د پښتونخوا ملي عوامي ګوند مشر او د پاکستان د اساسي قانون د ساتنې تحریک مشر محمود خان اڅکزي او د ګوند مرکزي منشي نواب ایاز خان جوګېزي ویلي، چې د جنوبي پښتونخوا د اوسنیو سختو سیاسي، اساسي، اقتصادي او امنیتي حالاتو له امله د اګست له ۳۰مې څخه د سپټمبر تر لومړۍ نېټې په کوټه کې کېدونکې جرګه ځانګړی اهمیت لري. دوی وویل، جرګه به د جنوبي پښتونخوا د ولس اساسي ستونزې، سیاسي او آئیني حقونه، امن و امان، پر طبیعي سرچینو د ځايي ولسونو حق، سرحدي سوداګري او د جمهوري او پارلماني نظام د پیاوړتیا په اړه د راتلونکي تګلارې پرېکړه کوي. دوی زیاته کړه چې په پښتني سیمو کې ترهګري، ناامني، د پیسو لپاره تښتونې، غلاوې او نور جرمونه د خلکو ژوند، مال او کاروبار سخت اغېزمن کړی او بین الصوبایي او نړیوالې لارې هم ناامنه شوې دي، په داسې حال کې چې پر ډیورنډ کرښه قانوني سوداګرۍ او تګ راتګ ته هم پرله‌پسې خنډونه جوړېږي. دواړو مشرانو د طبیعي سرچینو او ماینونو او معدنیاتو په قوانینو کې د داسې بدلونونو په اړه اندېښنه څرګنده کړه چې له امله یې د ځايي قومونو او قبایلو آئیني او قانوني حقونه له پامه غورځول کېږي او د غیر قانوني انتقالاتو د لغوه کولو غوښتنه یې وکړه. دوی په کول ماینونو کې د مبینې جبري باج اخیستنې، د ماین مالکانو او مزدورانو د ګواښونو، د باج اخیستنې پر وړاندې د مقاومت له امله د وژنو او د ټرانسپورټ د سوځولو د پېښو د مخنیوي غوښتنه وکړه. د دوی په وینا، په زیارت، منګله او هنه اورک کې د پېښو په ګډون باید د بېلابېلو پېښو شفافې او بې پرې پلټنې وشي. محمود خان اڅکزي او نواب ایاز خان جوګېزي وویل، چې هېواد د اساسي قانون د واکمنۍ، پارلماني جمهوریت، وفاقي اصولو او شفافې واکمنۍ پر بنسټ د بیا جوړېدو اړتیا لري. جرګه به د ولس د حقونو، آئیني واکمنۍ، امن و امان، پر طبیعي سرچینو د ځايي ولسونو د حق، سرحدي سوداګرۍ او د جمهوري او پارلماني نظام د پیاوړتیا لپاره څرګندې او عملي سپارښتنې وړاندې کړي.