کم عمر نجونو د ځانمرګو بریدونو لپاره کارولو د بي ایل اې پلان شنډ شو

کوټه(ویب نیوز) د بلوچستان د کورنیو چارو صوبايي وزیر میر ضیاء الله لانګو ویلي دي چې امنیتي ځواکونو د پټې خبرتیا پر بنسټ عملیات ترسره کړي او د بي ایل اې له خوا د کم عمره نجونو د ځانمرګو بریدونو لپاره د کارولو پلان یې شنډ کړی دی، په دې عملیاتو کې زینب او فاطمه نومې ۱۶ او ۱۲ کلنې دوه نجونې نیول شوې دي. د کورنیو چارو وزیر په خبري غونډه کې وویل چې کله د ترهګرۍ کومه پېښه وشي، نو تل دا پوښتنه کېږي چې امنیتي ځواکونه څه کوي، حال دا چې امنیتي ادارې د ترهګرۍ ګڼې پېښې له رامنځته کېدو مخکې شنډوي. د نوموړي په وینا، په جنوبي بلوچستان کې بي ایل اې هڅه کړې چې کم عمره نجونې وغولوي او د ځانمرګو بریدونو لپاره یې چمتو کړي. ۱۶ کلنې زینب د پلټنو پر مهال ویلي چې د هغې د خاوند سیف په ګډون د کورنۍ ګڼ کسان وژل شوي وو، وروسته ځايي قوماندان له هغې سره اړیکه ونیوله او د خاوند د وژنې تور یې پر امنیتي ادارو واچاوه او د بدل اخیستو لپاره یې وهڅوله. د زینب په وینا، د هغې د تره زوی ۱۲ کلنې فاطمې پلار هم په ترهګرۍ کې وژل شوی و او دواړه نجونې د احساساتي خبرو له لارې د ډلې له یوځای کېدو ته وهڅول شوې. د دواړو نجونو په وینا، هغوی د ډلې له کسانو سره یوځای شوې او شاوخوا ۴۰ ورځې یې په نامعلوم ځای کې تېرې کړې، چېرته چې د دوی په وینا ورباندې تشدد هم شوی دی. زینب او فاطمې ویلي چې کله له یوه نامعلوم ځای څخه بل ځای ته انتقالېدې، امنیتي ځواکونو د پټې خبرتیا پر بنسټ عملیات وکړل او دواړه یې ونیولې. دواړو نجونو د امنیتي ځواکونو له خوا د خپل ژوند د ژغورلو په خاطر مننه کړې او له حکومت او ولس څخه یې د عامې بښنې غوښتنه کړې ده.