مستونګ کې د باغونو وهل د ولس د کرکې د پیدا کولو پلان ښکاري، نواب اسلم رییساني

کوټه(ویب نیوز) د بلوچستان پخواني وزیراعلیٰ نواب اسلم رییساني ویلي دي چې په مستونګ او د بلوچستان په نورو سیمو کې د بزګرانو د مېوه لرونکو باغونو وهل، خلک له خپلو سیمو شړل او د هغوی کورونه او د روزګار وسایل له منځه وړل د قبایلو او عامو خلکو د متنفر کولو یوه منظمه او له مخکې طرحه شوې منصوبه ښکاري. نوموړي وویل که د خلکو بې ځایه کول، د کورونو نړول او د هغوی د اقتصادي وسایلو تباهي د ستونزو د دایمي حل لاره وای، نو په شمالي وزیرستان، جنوبي وزیرستان، دیر بالا، دیر لاندې، شانګله او نورو سیمو کې د ګڼو کورونو او کاروباري مرکزونو له نړولو وروسته به نن بشپړ امن ټینګ شوی وای. نواب اسلم رییساني وویل چې ستونزې د زور او تباهۍ له لارې نه حل کېږي، بلکې د ولس باور بېرته ترلاسه کول، د ځايي خلکو د حقونو ساتنه او د سیاسي او ټولنیزو ستونزو لپاره د هوښیارانه حل لارې موندل ضروري دي.