پښتون قومي جرګه د بنو جرګې د پرېکړو دوام دی، د پښتنو او بلوڅو ترمنځ هېڅ دښمني نشته، محمود خان اڅکزی

کوټه (ویب نیوز) د قومي اسمبلۍ اپوزېسیون مشر او د پښتونخوا ملي عوامي ګوند مشر محمود خان اڅکزي ویلي چې د پښتونخوا ملي عوامي ګوند له خوا جوړ شوی پښتون قومي جرګه د بنو قومي جرګې د پرېکړو او ملي مبارزې دوام دی، وخت راغلی چې ټول سیاسي ګوندونه، نوابان، قومي مشران او ملي مشرتابه سره کښېني او د پښتون قوم د ستونزو د حل لپاره ګډ ملي تګلوری جوړ کړي. نوموړي په کوټه کې د پښتون قومي جرګې د پرانیستې غونډې ته په وینا کې وویل چې دا جرګه د کوم یوه سیاسي ګوند یا ځانګړې ډلې نه، بلکې د ټول پښتون قوم د بقا، حقونو او راتلونکي جرګه ده. محمود خان اڅکزي څرګنده کړه چې پښتون قومي جرګه په هېڅ صورت د بلوڅ قوم پر ضد نه ده، بلوڅان په خپله تاریخي خاوره کې مېشت دي او پښتانه او بلوڅ له پېړیو راهیسې یو د بل ګاونډیان دي، د دواړو قومونو ترمنځ هېڅ دښمني او جګړه نشته او د ټولو ستونزو د حل لپاره د ورورولۍ خبرو، متقابل درناوي او سوله ییز ګاونډیتوب غوښتونکي دي. هغه وویل چې پاکستان د پنجابیانو، سندیانو، بلوڅو، سرایکیانو او پښتنو په ګډون د ټولو قومونو ګډ هېواد دی او دلته هېڅ قوم نه آقا دی او نه غلام، د اساسي قانون او قانون له مخې ټولو قومونو ته باید برابري، انصاف او خپل روا حقونه ورکړل شي. نوموړي د پښتني سیمو د ځمکو د ادعا شوو نیونو او د وېش او نښه بندۍ ستونزو ته په اشارې وویل چې د پښتنو سیمې له لیتیم، سرو زرو، سپینو زرو، مسو او نورو نایابه معدني زېرمو څخه بډایه دي، خو د دې سرچینو باوجود خلک د بې وزلۍ او محرومۍ سره مخ دي او تکړه ځوانان د روزګار لپاره بهرنیو هېوادونو ته مزدورۍ ته اړ شوي دي. هغه وویل چې پښتانه ترهګر قوم نه، بلکې مېلمه پال، انسان دوست او سوله ییز قوم دی، په سیمه کې د روانې ناامنۍ او جګړو د پای ته رسولو لپاره سیاسي خبرې، ولسواکه مبارزه، ملي یووالی او ګډه سلا یوازینۍ لار ده. اڅکزي له نړیوالې ټولنې، ملګرو ملتونو او سیمه ییزو ادارو وغوښتل چې په افغانستان او پښتني سیمو کې د دایمي سولې لپاره خپل رول ولوبوي او زیاته یې کړه چې د پښتنو او بلوڅو ترمنځ هېڅ جګړه او شخړه نشته، دواړه قومونه حق لري چې په خپلو تاریخي سیمو کې په سوله، برابري او متقابل درناوي سره ژوند وکړي.