د زیارت کراس د ترهګر برید غندنه، پر لویو لارو دې امنیت یقیني شي، عوامي نېشنل ګوند

کوټه(وېب نیوز) د عوامي نېشنل ګوند د صوبايي بیان له مخې د زیارت کراس پر ترسره شوي ترهګریز برید په سختو ټکو غندل شوی او ویل شوي چې په بلوچستان کې په پرله‌پسې توګه رامنځته کېدونکي ترهګریز بریدونه، په ځانګړي ډول پر بین الصوبايي لویو لارو د ناامنۍ او بې باورۍ وضعیت د جدي اندېښنې وړ دی. په بیان کې ویل شوي چې د لویو لارو د ناامنه کولو تر شا چې هر ډول ناوړه موخې او عناصر فعالیت کوي، د هغوی مخنیوی او له منځه وړل د حکومت او دولتي ادارو اساسي مسوولیت دی. ترهګري په هره بڼه د منلو وړ نه ده او د دولت مسوولیت یوازې د ترهګریزو پېښو وروسته غبرګون ښودل نه دي، بلکې خلکو ته د خوندي چاپېریال برابرول، د هغوی د سر او مال ساتنه یقیني کول او د داسې پېښو د مخنیوي لپاره د اغېزمنې، دایمي او همغږې تګلارې عملي کول هم د دولت دنده ده. بین الصوبايي لویې لارې بلوچستان د هېواد له نورو برخو سره نښلونکي مهمې لارې دي او پر دغو لارو د مسافرو، ټرانسپورټي کارکوونکو، سوداګرو او بار وړونکو موټرو ناامنه کول د صوبې پر اقتصادي او ټولنیزو فعالیتونو مستقیم اغېز کوي. په بیان کې ویل شوي چې د زیارت کراس په ګډون د صوبې په بېلابېلو سیمو کې پرله‌پسې ترهګریزو پېښو د امن او امان په اړه د حکومت ادعاوې له پوښتنو سره مخ کړې دي. له یوې خوا حکومت د حالاتو د عادي کېدو او د «هر څه سم دي» دعوې کوي، خو له بلې خوا ولس پر لویو لارو، بازارونو او نورو عامه ځایونو کې له ناامنۍ سره مخ دی. عوامي نېشنل ګوند ویلي چې په بلوچستان کې روانه ناامني یوازې د څو پېښو په توګه نه شي له پامه غورځول کېدای، ځکه پرله‌پسې ترهګریز بریدونه دا تاثر پیاوړی کوي چې د امن او امان لپاره موجوده تګلاره له ناکامۍ سره مخ ده. حکومت باید یوازې پر بیانونو او رسمي اقداماتو بسنه ونه کړي، بلکې عملي ګامونه پورته کړي، څو ولس په څرګنده احساس کړي چې دولت د هغوی د سر او مال د ساتنې لپاره جدي او فعال دی. په بیان کې غوښتنه شوې چې د زیارت کراس د برید په ګډون د وروستیو ترهګریزو پېښو شفافې او بې پرې پلټنې وشي، د پېښو محرکین، طرحه کوونکي، مرسته کوونکي او مسوول کسان په ډاګه او قانون ته وسپارل شي. همدارنګه پر مهمو بین الصوبايي لویو لارو دې اغېزمن امنیتي تدابیر ونیول شي، د مسافرو او ټرانسپورټي کارکوونکو ساتنه، د دولتي او شخصي شتمنیو خونديتوب او د ولس د تګ راتګ د خوندي کولو لپاره دې عملي ګامونه پورته شي. د ترهګرۍ پر وړاندې په مبارزه کې دوه‌ګونې تګلارې، لنډمهاله اقدامات او یوازې اعلانونه هېڅ ډول د منلو وړ نه دي، بلکې د دولت او حکومت مسوولیت دی چې د صوبې ټولو اوسېدونکو ته له توپیر پرته امنیت برابر کړي.