درې ورځنۍ پښتني قومي جرګه پای ته ورسېده، ۱۹ نکاتي اعلامیه خپره شوه

کوټه (وېب نیوز) درې ورځنۍ پښتني قومي جرګه پای ته ورسېده او ۱۹ نکاتي اعلامیه یې خپره کړه. جرګې د فبرورۍ د اتمې ټاکنې رد کړې او د اوسني پارلمان د ختمولو او د نویو، ازادو او شفافو ټاکنو غوښتنه یې وکړه، همداراز یې ۲۶مه او ۲۷مه آئیني ترمیمونه رد او د هېواد د ستونزو د حل لپاره د ټولو اړخونو د ګډ کنفرانس غوښتنه وکړه. جرګې د پښتون او بلوچ د برابرۍ د منلو یا د جنوبي پښتونخوا د نوې صوبې جوړولو، له ټولو ضلعو او لویو لارو څخه د ایف سي د سمدستي ایستلو، د ملکي واک د بحالولو او د لېویز ځواک د بېرته فعالولو غوښتنه وکړه. په اعلامیه کې د طبیعي سرچینو او ځمکو د غیر محلي کسانو پر مبینې تخصیص مخالفت، د قانوني سرحدي سوداګرۍ د بحالولو، د سیاسي بندیانو د خوشې کولو، د لادرکه کسانو د موندلو او د څلورم شیډول د ختمولو غوښتنې هم شاملې دي. جرګې د سیاسي مذاکراتو، ملکي واکمنۍ او د ولسي حقونو د خوندي کولو پر عملي اقداماتو ټینګار وکړ.