د ډاکټر عایشه فیض نیول سیاسي او اخلاقي جواز نه لري؛ میر طاهر بزنجو

کوټه (ویب نیوز) د نېشنل ګوند مرکزي مشر، پخواني سناتور او لیکوال میر طاهر بزنجو د ډاکټر عایشه فیض پر نیول کېدو سخت غبرګون ښودلی او ویلي یې دي چې د هغې پلار ملک فیض جان یوسفزي د دوی د لومړنیو او لوړپوړو سیاسي مشرانو له ډلې و، چې د خپل ژوند تر وروستۍ شېبې یې د هېواد او هېوادوالو خدمت کړی دی. میر طاهر بزنجو وویل، کېدای شي د ډاکټر عایشه فیض له نظرونو سره څوک اختلاف ولري، خو د هغې پر ضد د ترهګرۍ مقدمې درجول او نیول یې هېڅ ډول سیاسي او اخلاقي جواز نه لري. هغه له اړوندو چارواکو غوښتنه وکړه چې ډاکټر عایشه فیض دې سمدستي په درناوي خوشې کړي. نوموړي وویل چې سیاسي اختلاف نظر باید د قضیو او نیونو له لارې ونه ځپل شي، بلکې د اختلاف د زغملو لپاره باید له ډیموکراتیکو او سیاسي لارو کار واخیستل شي.