د کوټې عامه ټرانسپورټ او ټرافیکي ستونزې؛ هایکورټ د جامع راپورونو غوښتنه وکړه

کوټه (ویب نیوز) د بلوچستان هایکورټ چیف جسټس جسټس محمد کامران خان ملاخېل او جسټس محمد نجم الدین مېنګل په مشرۍ دوه کسیز بینچ په کوټه ښار کې د عامه ټرانسپورټ، لوکل بسونو، رکشو او ټرافیکي ستونزو په اړه د آئیني درخواست اورېدنه وکړه. د اورېدنې پر مهال اېډیشنل اېډووکېټ جنرل ظهور بلوچ، د بلوچستان ټرافیک انجینرنګ بیورو ډایرکټر اېډمنسټرېشن شکیل احمد، د درخواست ورکوونکي وکیله محترمه انعم خیر، د میونسپل کارپوریشن کوټه وکیل اظهار الحق ترین، د کوټه ډویلپمنټ اتهارټۍ وکیل محمد اکرم شاه، د ډي جي اورنګزېب کاسي، د اربن پلاننګ اینډ ډویلپمنټ ډیپارټمنټ ډپټي ډایرکټر کلیم الله او نور اړوند چارواکي محکمې ته حاضر شول. د ریجنل ټرانسپورټ اتهارټۍ کوټه ډویژن جنرل سېکرټري محکمې ته د پرمختګ راپور وړاندې کړ چې پکې په کوټه کې د عامه ټرانسپورټ لپاره په فیډر روټونو د ۲۷ برقي موټرو برابرول، د کوټې لپاره د دوو برقي بسونو او د صوبې د نورو ضلعو لپاره د لسو ډیزلي بسونو برابرول، د وکیلانو لپاره د عامه ټرانسپورټ سکیم، په سریاب سړک د لوکل بس اډې لپاره د ځمکې انتقال، د کوټه-کچلاک روټ لپاره د کوسټرونو اجازت نامې، د غیر قانوني او له ټاکلې شمېرې د زیاتو رکشو پر وړاندې کارروایي او د ۹۴۵۱ لاسي رکشو د پرمټونو د کمپیوټرایزېشن په اړه پرمختګ وړاندې شو. محکمې ته وویل شول چې د پرمختګ راپور یوه کاپي د درخواست ورکوونکي وکیل ته هم ورکړل شوې ده. د اورېدنې پر مهال د هایکورټ بار اېسوسیېشن صدر اېډووکېټ عطا الله لانګو د محکمې پام دې لوري ته راوګرځاوه چې د محکمې د پخوانیو لارښوونو باوجود په کوټه کې پر مرکزي او فیډر روټونو لا هم لوکل بسونه چلېږي چې دا د عدالتي احکامو ښکاره سرغړونه ده. نوموړي وویل چې د کوټې، پشین او خضدار د وکیلانو لپاره د عامه ټرانسپورټ په اسانتیا کې دوه ډیزلي بسونه، دوه ګلابي وینونه، دوه برقي شټل کارټونه او ۱۰۰ پنک برقي سکوټۍ ځانګړې شوې دي، خو پر دې منصوبه تر اوسه د پام وړ عملي پرمختګ نه دی شوی. د محکمې د پوښتنې په ځواب کې وویل شول چې د ښځینه وکیلانو لپاره ځانګړې شوې ۱۰۰ پنک برقي سکوټۍ له هیلمټونو سره ترلاسه شوې دي، خو د وکیلانو لپاره د نورو ټرانسپورټي اسانتیاوو په اړه عملي اقدامات لا بشپړ شوي نه دي. اېډیشنل اېډووکېټ جنرل محکمې ته وویل چې په سریاب سړک کې د پخواني اېکټراي ګودام په ځای د لوکل بس اډې لپاره ځانګړې شوې ځمکه لا تر اوسه کمشنر/چیئرمېن ریجنل ټرانسپورټ اتهارټۍ او سېکرټري ته نه ده انتقال شوې، چې له امله یې پر منصوبه عملي پرمختګ نه دی شوی. د بلوچستان ټرافیک انجینرنګ بیورو ډایرکټر اېډمنسټرېشن شکیل احمد د محکمې د پوښتنې په ځواب کې وویل چې په کوټه ښار کې د موټر رکشو د بدیل په توګه د برقي موټرو د برابرولو منصوبه د روان مالي کال په کې شامله شوې وه او په لومړي سر کې ورته یو ارب، ۲۳۵ اعشاریه ۳۰۰ میلیونه روپۍ ځانګړې شوې وې، خو د محکمې له مشاهداتو وروسته منصوبه پبلک پرایوېټ پارټنرشپ اتهارټۍ ته وسپارل شوه او د بیا کتنې وروسته یې لګښت ۵۹۵ اعشاریه ۷۲۰ میلیونه روپۍ وټاکل شو چې د وروستۍ پرېکړې لپاره د پلاننګ او ډویلپمنټ ډیپارټمنټ کې تر غور لاندې دی. درخواست ورکوونکي په خپله محکمې ته حاضر شو او جدي اندېښنې یې څرګندې کړې چې د محکمې د څرګندو لارښوونو باوجود د کوټې ښار او شاوخوا سیمو د ټرافیک په وضعیت کې د پام وړ ښه والی نه دی راغلی او اړوند دولتي ادارې د عملي اقداماتو پر ځای یوازې راپورونه وړاندې کوي. محکمې پر وضعیت اندېښنه څرګنده کړه او اېډیشنل اېډووکېټ جنرل ته یې لارښوونه وکړه چې د ټرانسپورټ ډیپارټمنټ د سېکرټري په لاسلیک جامع راپورونه راتلونکې اورېدنې ته وړاندې کړي، چې پکې د لوکل بس اډې لپاره د ځانګړې شوې ځمکې د انتقال اوسنی وضعیت، په کوټه ښار کې د موټر رکشو د بدیل په توګه د برقي موټرو د برابرولو منصوبې اوسنی حالت او د وکیلانو لپاره د عامه ټرانسپورټ د اسانتیا د منظورۍ او عملي پرمختګ معلومات شامل وي. محکمې د سېکرټري ته هم لارښوونه وکړه چې په کوټه ښار کې د زړو او ناکاره بسونو د چلولو په اړه تفصیلي راپور وړاندې کړي. محکمې د پلاننګ او ډویلپمنټ ډیپارټمنټ، ریجنل ټرانسپورټ اتهارټۍ او بلوچستان ټرافیک انجینرنګ بیورو اړوند افسرانو ته په راتلونکې اورېدنه کې د شخصي حاضرۍ لارښوونه وکړه او د قضیې اورېدنه یې د ۲۰۲۶ کال د سپټمبر تر ۸مې وځنډوله. د عدالتي حکم نقل د اېډیشنل اېډووکېټ جنرل دفتر ته هم د لېږلو لارښوونه وشوه، څو اړوندو چارواکو ته ورسول شي او د محکمې د احکامو عملي کېدل یقیني شي.