د ځواکمنې مصنوعي ځیرکتیا لپاره د تباهۍ خپرولو په موخه فزیکي واک اړین نه دی، جیفري هینټن

کوټه (ویب نیوز) د مصنوعي ځیرکتیا پلار او د نوبیل جایزې ګټونکي ساینس پوه جیفري هینټن خبرداری ورکړی چې په راتلونکو لسو کلونو کې د مصنوعي ځیرکتیا له امله د ټول بشریت د له منځه تلو د لس سلنې خطر اټکل غیرمعقول نه دی، خو هېڅوک د دغه خطر دقیقه کچه نه شي ټاکلی. نوموړي له یوه برتانوي خپرندوی بنسټ سره په خبرو کې وویل چې انسانانو تر دې وړاندې داسې موجود نه و جوړ کړی چې ښايي په راتلونکي کې تر انسانانو ډېر هوښیار شي، نو ځکه د مصنوعي ځیرکتیا د پایلو په اړه په ډاډه توګه وړاندوینه نه شي کېدای. جیفري هینټن وویل چې د مصنوعي ځیرکتیا خطر یوازې یو سلنه ګڼل هم خورا غیرمسوولانه کار دی، په داسې حال کې چې د لس سلنې خطر اټکل هم نامعقول نه دی. هغه وویل چې ځواکمنې مصنوعي ځیرکتیا ته په نړۍ کې د تباهۍ خپرولو لپاره فزیکي واک لرل اړین نه دي، بلکې سوپر مصنوعي ځیرکتیا د خلکو له لارې د خبرو اترو په وسیله هم په پراخه کچه ګډوډي رامنځته کولی شي. د هغه په وینا، دا ډول ټکنالوژي د خطرناکو بیولوژیکي او کمپیوټري وایرسونو د جوړولو، پراخو سایبري بریدونو او نورو داسې زیانونو لامل کېدای شي چې اوس یې اټکل ستونزمن دی، او تر ټولو مهمه ننګونه دا ده چې مصنوعي ځیرکتیا باید داسې جوړه شي چې د انسانانو پر ضد زیانمن اهداف غوره نه کړي.