پر ایراني سوداګریزې بېړۍ د امریکا برید، یو ایراني وګړی وژل شوی، د دوو پاکستانیانو په ګډون ۴ تنه ټپیان

کوټه(ویب نیوز) د جنوبي ایران د قشم ټاپو ترڅنګ پر یوې ایراني سوداګریزې کانټینري بېړۍ د امریکا د سمندري ځواکونو په برید کې د عملې یو غړی وژل شوی او د دوو پاکستانیانو په ګډون څلور کسان سخت ټپیان شوي دي. د ایراني خبري اژانس فارس د راپور له مخې، بېړۍ له جبل علي څخه بندرعباس ته روانه وه او لس کسان پکې سپاره وو چې پنځه ایرانیان او پنځه پاکستانیان وو. د برید وروسته ټول ټپیان د قشم روغتون ته انتقال شوي دي. د ایران د بهرنیو چارو وزارت ویاند اسماعیل بقايي برید په کلکه غندلی او ویلي یې دي چې امریکا او اسرائیل په دوامداره توګه د فارس خلیج سوله او امنیت په نښه کوي. ایراني چارواکو دغه پېښه د سوداګریزې بېړۍ چلونې پر وړاندې د دښمنانه اقدام په توګه یاده کړې ده.