په شاهرګ کې د ۲۰ ساعته اوږدې لوډشیډنګ پر ضد د ټول ګوندونو او سوداګرو احتجاج، د کوټې ـ هرنای ملي لاره وتړل شوه

هرنای (وېب نيوز)د هرنای ولسوالۍ د شاهرګ تحصیل اوسېدونکو د ۲۰ ساعتونو څخه د زیاتو اوږدو او بې‌خبره برېښنايي لوډشیډنګ پر ضد د ټولو سیاسي ګوندونو، د سوداګرو اتحادیې او مدني ټولنې په مشرۍ سخت احتجاج کړی او د شاهرګ په پهاټک کې یې د هرنای ـ کوټې ملي شاهراه د هر ډول ټرافیک پر مخ تړلې ده. مظاهره کوونکو پر سړک خېمه وهلې او پرلت یې پیل کړی، چې له امله یې د لارې دواړو غاړو ته د موټرو اوږدې کتارونه جوړ شوي دي. د لارې بندېدو له امله کوټې او نورو سیمو ته تلونکي او له هغه ځایه هرنای ته راتلونکي مسافر، په ځانګړي ډول ښځې، ماشومان، ناروغان او زاړه کسان د سختې ګرمۍ له امله له ګڼو ستونزو سره مخ دي. مظاهره کوونکي وايي چې د سختې ګرمۍ په موسم کې د شاهرګ خلک د ۲۰ ساعتونو څخه زیاتې بدترینې لوډشیډنګ سره مخ دي، چې د خلکو ورځنی ژوند یې فلج کړی دی. د ملي لارې د بندېدو له کبله مسافر اړ دي چې د ډومیارې له خطرناکې او خامې لارې په خطرناکه سفر خپل منزل ته ورسېږي. د وروستیو راپورونو تر مخې د کیسکو پر ضد احتجاجي پرلت لا هم دوام لري او تر اوسه پورې نه ضلعي انتظامیې او نه هم د کیسکو مسؤلینو د مظاهره کوونکو سره د خبرو لپاره کوم ګام پورته کړی دی.