د هرمز تنګي له لارې د تګ پر فیس لګولو د ایران د پلان ملاتړ نه کوو، قطر

دوحه (وېب نیوز) د قطر وزیراعظم شیخ محمد بن عبدالرحمن آل ثاني ویلي دي چې قطر به د هرمز تنګي له لارې د بېړیو پر تګ د فیس لګولو د ایران د هر ډول پلان ملاتړ ونه کړي. نوموړي یوې برتانوي ورځپاڼې ته په مرکه کې وویل چې په هرمز تنګي کې د سمندري تګ راتګ د عادي کېدو لپاره د امریکا او ایران ترمنځ رامنځته شوې هاټ لاین ډېره مهمه ده، ځکه دا به د غلطو معلوماتو او احتمالي پارونوونکو پېښو مخه ونیسي. هغه وویل چې ځینې عناصر ښایي د هر ډول موافقې د ناکامولو هڅه وکړي، نو ځکه اړینه ده چې د بېړیو پر ضد هر ډول ګواښ له ایران سره تایید شي. د قطر وزیراعظم زیاته کړه که ایران کوم نوی ماډل یا وړاندیز وړاندې کړي، نو باید د هغه په حق کې دلایل وړاندې کړي او قطر به یې په دقت سره ارزونه وکړي. نوموړي ټینګار وکړ چې نړۍ ته د لاسرسي پر مهم سمندري مسیر د یوه هېواد کنټرول د منلو وړ نه دی او هیله یې څرګنده کړه چې په راتلونکو ۳۰ ورځو کې به سمندري فعالیتونه د جګړې له مخکینۍ کچې سره نږدې شي او د قطر د ایل این جي تولید به هم په څو اونیو کې بېرته عادي حالت ته راوګرځي.