د موهن جو داړو د قیمتي تاریخي اثارو د غلا ادعا شوې هڅه ناکامه، یو شکمن نیول شوی

جیکب آباد۰(وېب نیوز)د جیکب آباد پولیسو د یوې حساسې ادارې د پټو معلوماتو پر بنسټ په ګډو عملیاتو کې د موهن جو داړو د قیمتي تاریخي اثارو د ادعا شوې غلا او قاچاق په تور یو شکمن کس نیولی دی. د پولیسو په وینا، له نیول شوي کس څخه غیرقانوني وسله او نور مهم شواهد هم ترلاسه شوي دي. چارواکي وایي، نیول شوی کس سید لال شاه نومېږي او د بلوچستان د جهل مګسي ولسوالۍ اوسېدونکی دی. د لومړنیو پلټنو له مخې، نوموړی د تاریخي اثارو د غلا او بهر ته د قاچاق له یوې منظمې شبکې سره تړاو لري او د موهن جو داړو د قیمتي اثارو د غلا پلان یې هم جوړ کړی و. پولیسو ویلي چې د هغه د نورو همکارانو او د قاچاق د شبکې د غړو د نیولو لپاره عملیات روان دي او د هېواد د تاریخي میراث د ساتنې لپاره به بې توپیره اقدامات دوام ولري.