کوټه (سید سردار محمد خندئی)
د پاکستان وزیراعظم میاں محمد شهباز شریف د چهارشنبې په ورځ د یوې ورځنۍ سفر لپاره کوټې ته ورسید، چېرته یې د صوبایي اپیکس کمیټې د لوړې کچې غونډې مشري وکړه.
په غونډه کې د مهمو شخصیتونو ګډون
په غونډه کې د پوځ سرلښکر فیلډ مارشل سید عاصم منیر، د بلوچستان ګورنر شیخ جعفر خان مندوخېل، وزیراعلی میر سرفراز بګټي، کمانډر ۱۲ کور، د کورنیو چارو وفاقي وزیر او نورو لوړ پوړو ملکي او پوځي مشرانو ګډون وکړ. غونډه د زیارت په ګډون د شهیدانو لپاره د فاتحې په لوستلو سره پیل شوه.
کله چې وزیراعظم د کوټې هوایی ډګر ته ورسید، د بلوچستان وزیراعلی میر سرفراز بګټي، ګورنر شیخ جعفر خان مندوخېل، د بلوچستان آی جي پولیس محمد طاهر محمود او نورو لوړ پوړو چارواکو یې تود هرکلی وکړ.
اپیکس کمیټې ته د وزیراعظم وینا
وزیراعظم شهباز شریف وویل:
“الله تعالی پاکستان ته په نړیواله کچه عزت او وقار ورکړی دی. که هغه زموږ ډیپلوماټیکې بریاوې وي او که تېر کال د می په میاشت کې څلور ورځنۍ جګړه، چې په کې پاکستان د الله په فضل سره بریالی شو، دښمن یې نشي زغملای. له همدې امله دوی هڅه کوي چې په هېواد کې بې ثباتي رامنځته کړي.
زه، فیلډ مارشل سید عاصم منیر او د بلوچستان حکومت د ملت ډاډ ورکوو چې د دې لعنت د ختمولو لپاره به له هېڅ قربانۍ ډډه ونکړو. موږ به ټولې سرچینې وکاروو او، انشاءالله، ترهګري به په بشپړه توګه ختمه کړو.
وزیراعظم زیاته کړه چې یو ګاونډی هېواد په بشپړه توګه ترهګرو عناصرو ته مالي مرسته کوي او په بلوچستان کې د سولې د خرابولو هڅې کوي. هغه په ډاګه کړه: “جګړه به تر هغې دوام وکړي تر څو چې فتنه الهند او فتنه الخوارج په بشپړه توګه ختمه نه شي. موږ هغو شهیدانو ته سلام کوو چې په زیارت او د بلوچستان په نورو سیمو کې یې د ملت لپاره خپل ژوند قربان کړ. ټول دولت ضد عناصر دې پوه شي چې سیاسي او پوځي مشرتابه په یوه پاڼه ولاړ دي. بلوچستان د پاکستان د تاج ګوهر دی.
د امنیتي وضعیت په اړه بریفینګ
د سفر په ترڅ کې وزیراعظم او فیلډ مارشل سید عاصم منیر ته د بلوچستان د وروستیو پېښو او عمومي امنیتي وضعیت په اړه تفصیلي بریفینګ ورکړل شو. وزیراعظم اعلان وکړ چې د ترهګرو پر ضد په عملیاتو کې به د دولت ټولې سرچینې وکارول شي.
وزیراعظم شهباز شریف د یوې ورځنۍ سفر له بشپړولو وروسته اسلام آباد ته روان شو.
