په موله کې د پيپلز ګوند د مشر د زوی د وژنې سخته غندنه، نواب ثناءالله زهري د شفافو پلټنو غوښتنه وکړه

کوټه (وېب نیوز) د بلوچستان پخواني وزيراعلی او د جهالاوان مشر نواب ثناءالله خان زهري د خضدار ولسوالۍ د موله سيمې کې د پاکستان پيپلز ګوند د مشر مير داد کريم جام د زوی د مبينه تښتونې او وژنې پېښه په کلکو ټکو وغندله او دا يې يو خواشينوونکی او غيرانساني عمل وباله. نوموړي په خپل بيان کې وويل چې د بې ګناه خلکو په نښه کول د منلو وړ نه دي او د دې ډول پېښو موخه په بلوچستان کې ويره خپرول دي. هغه د غمځپلې کورنۍ سره خواخوږي څرګنده کړه او غوښتنه يې وکړه چې د پېښې شفافې پلټنې دې وشي او ککړ کسان دې ژر تر ژره ونيول شي، څو اغېزمنې کورنۍ ته انصاف ورکړل شي.