د ډېره الله یار په لیډیز بازار کې ډزو یو کس وژلی او بل یې ټپي کړی، یو شکمن نیول شوی

کوټه (ویب نیوز)د ډېره الله یار ښار د لیډیز بازار په مصروفه سیمه کې د نامعلومو وسله‌والو په ډزو کې یو کس وژل شوی او بل سخت ټپي شوی دی، چې له پېښې وروسته پولیسو یو شکمن کس له وسلې سره نیولی دی. د پولیسو په وینا، پېښه د ډېره الله یار پولیس سټېشن په حدودو کې رامنځته شوې او د ډزو له امله په سیمه کې وېره خپره شوې ده. د سرکل ډي اېس پي طالب حسین لاشاري وویل چې وژل شوی کس نظر محمد کندراني نومېږي او ټپي شوی پروېز علي دی، چې دواړه د صحبت پور اوسېدونکي دي. ټپي کس ته لومړنۍ طبي مرستې ورکړل شوې او د نورو درملنو لپاره سکر ته لېږدول شوی دی. پولیس وایي چې د پېښې د علت په اړه لا بشپړ معلومات نه دي ترلاسه شوي او پلټنې روانې دي، په داسې حال کې چې د وژل شوي کس مړی د ډې اېچ او روغتون سردخانې ته لېږدول شوی دی.