کوټه، د علماوو او مشرانو د قربانیو له امله د پاکستان نظریاتي بنسټ خوندي دی، مولانا عبدالرحمن رفیق

کوټه(ویب نیوز) د جمعیت علمای اسلام ضلع کوټې امیر شیخ الحدیث مولانا عبدالرحمن رفیق، عمومي منشي حاجي عین الله شمس او مشر مرستیال امیر مولانا خورشید احمد ویلي چې د سترو علماوو او دیني مشرانو د تلپاتې مبارزې، قربانیو او دوامدارې فکري او سیاسي هڅې له امله د پاکستان نظریاتي بنسټ او اسلامي تشخص تر اوسه خوندي پاتې دی. دوی وویل چې د هېواد د اسلامي تشخص او نظریاتي پېژندګلوۍ د کمزورې کولو هره هڅه علماوو او دیني قوتونو تل د اساسي، جمهوري او سوله‌ییزې مبارزې له لارې ناکامه کړې ده. دوی وویل چې تاریخ شاهد دی، کله چې هېواد له سختو او حساسو حالاتو سره مخ شوی، علماوو د ولس د لارښوونې دنده ترسره کړې او خلک یې له ناهیلۍ څخه ایستلي او د یووالي، صبر، زغم او اساسي قانون له لارې د مبارزې لار یې ورښودلې ده. د دوی په وینا، دیني مدرسو او علماوو د تعلیم، اصلاح، دعوت، ټولنیزې هوساینې او خدمت په برخو کې ارزښتناک خدمتونه ترسره کړي چې د ملي تاریخ روښانه باب دی، نو د دغو خدمتونو د ستاینې پر ځای د علماوو او مدرسو پر ضد منفي تبلیغات، بې‌بنسټه تورونه او د بدنامولو هڅې په هېڅ صورت د منلو وړ نه دي. بل لوري ته د جمعیت علمای اسلام ضلع کوټې د روانو تنظیمي سفرونو په لړ کې د ضلعي عاملې غړو او ضلعي کمېټو د بېلابېلو یونټونو تفصیلي کتنه وکړه. په دغو سفرونو کې مولانا خورشید احمد، مولانا محب الله، مولانا محمد ایوب، مولانا محمد سلیمان، مولانا حافظ رشید احمد، حافظ مسعود احمد، مولانا شعیب جدون، مفتي محمد روزي خان بادیزي، حاجي ولي محمد بړېڅ، حاجي محمد شاه لالا، مفتي محمد ابوبکر، مفتي رشید احمد حقاني، حاجي عطا محمد شمشوزي او نورو مسؤلینو ګډون وکړ. ضلعي کمېټو د محمود اباد یونټ پښتون اباد، نواں کلي یونټ، حلقه ۳۹ کلي بادیزي یونټ، ارباب کرم خان روډ یونټ، حسان بن ثابت یونټ سرکي روډ، حلقه ۲۰ شالدره، مولانا عبدالقادر یونټ بهوسه منډۍ، دیوبند یونټ ختیځ بای پاس، پرکاني اباد یونټ او نورو یونټونو ته سفرونه وکړل او د عاملې په غونډو کې یې ګډون وکړ. د تنظیمي سفرونو پر مهال د یونټونو عمومي فعالیت، د عاملې او شوراګانو فعالیت، د غونډو دوام، د څانګو کارکردګي، له کارکوونکو سره اړیکې، مالي نظم، د تنظیمي ریکارډ بشپړتیا، د ضلعي لارښوونو عملي کېدل او راتلونکي تنظیمي اهداف په تفصیل وڅېړل شول. ضلعي کمېټو د تنظیمي چارو په اړه د یونټ مسؤلینو څخه معلومات ترلاسه کړل او د ستونزو، اداري کمزوریو او تنظیمي اړتیاوو په اړه یې مشوره وکړه. مسؤلینو یونټونو ته د ضلعي عاملې پرېکړې، تنظیمي لومړیتوبونه، راتلونکی پلان او د مسؤلینو دندو په اړه معلومات ورکړل او لارښوونه یې وکړه چې په یونټونو کې دې منظمې غونډې، له کارکوونکو سره دوامدارې اړیکې، د څانګو فعالول او د تنظیمي ریکارډ بشپړ ساتل یقیني کړل شي.