پاکستان، ترکیې او سعودي عربستان دفاعي تړون د نوې تاریخ پیل دی، بخت محمد کاکړ

کوټه (ویب نیوز)د بلوچستان د روغتیا صوبايي وزیر بخت محمد کاکړ د پاکستان، ترکیې او سعودي عربستان ترمنځ تاریخي ګډ دفاعي تړون د هرکلي وړ بللی او ویلي یې دي چې دغه اتحاد د اسلامي نړۍ لپاره د دفاعي او ستراتیژیکې همکارۍ د نوي او پیاوړي پړاو پیل دی. نوموړي وویل چې د درې واړو وروڼو اسلامي هېوادونو ترمنځ دغه ګام به متقابلې اړیکې لا پیاوړې کړي. د پاکستان دفاعي وړتیا، د ترکیې عصري ټکنالوژي او د سعودي عربستان اقتصادي او ستراتیژیک اهمیت په ګډه کولی شي په سیمه کې متوازنه ځواک رامنځته کړي. بخت محمد کاکړ څرګنده کړه چې دغه تړون د هېچا پر ضد نه دی، بلکې د ګډ امنیت او سیمه‌ییزې سولې د ساتنې لپاره دی، چې له امله به یې د عصري ټکنالوژۍ، روزنې او ګډې ستراتیژۍ په برخو کې د همکارۍ نوې لارې پرانیستل شي او دغه پرمختګ به د راتلونکو نسلونو لپاره د خوندي سیمې د بنسټ په توګه ثابت شي.