کراچۍ کې د سردار اختر مېنګل د استوګنځي ته څېرمه پر اپارتمان چاپه، ۱۳ کسان نیول شوي، اختر مېنګل

کوټه/کراچۍ (ویب نیوز) د بلوچستان نېشنل ګوند (بي اېن پي) مشر او د بلوچستان پخواني اعلی وزیر سردار اختر مېنګل ادعا کړې چې تېره شپه په کراچۍ کې د هغه د استوګنځي ته څېرمه د کارکوونکو لپاره په کرايه نیول شوي یوه اپارتمان باندې استخباراتي ادارو چاپه وهلې، چې پر مهال یې په اپارتمان کې موجود ۱۳ کسان نیول شوي دي. د سردار اختر مېنګل په وینا، د چاپې پر مهال د نیول شویو کسانو موبایل ټیلیفونونه هم ضبط شوي او ادعا یې کړې چې ځینې کسان وهل شوي دي. نوموړي وویل چې وروسته یو شمېر کسان خوشې شول، خو د هغه مدیر او یو امنیتي ساتونکی په ګډون دوه کسان لا هم ورک دي. د بي اېن پي مشر په وینا، له ۱۳ کسانو څخه حاجي رجب او احمد لا هم نه دي خوشې شوي، په داسې حال کې چې نور کسان وروسته خوشې شوي دي. سردار اختر مېنګل د پېښې په اړه اندېښنه څرګنده کړې او ویلي یې دي چې که د چا پر ضد کوم تور وي، نو باید د شفاف او قانوني بهیر له لارې ورسره چلند وشي او نیول شویو کسانو ته دې ټول قانوني او اساسي حقوق ورکړل شي. نوموړي له سند حکومت او پاکستان پیپلز ګوند څخه هم غوښتنه کړې چې په سند کې د بلوچستان سره د تړاو لرونکو کسانو د امنیت او مبینہ ستونزو په اړه سمدستي پام وکړي. تر اوسه د دې پېښې په اړه د سند حکومت، پولیسو یا اړوندو ادارو رسمي دریځ نه دی څرګند شوی.