د جنوبي وزیرستان اپر او لوئر په ځینو سیمو کې ګرځبندیز اعلان، ګڼې لویې لارې به تړلې وي

کوټه (ویب نیوز) د جنوبي وزیرستان اپر او لوئر په ځینو سیمو کې د دوشنبې په ورځ د ګرځبندیز اعلان شوی او ګڼې مهمې لارې به د سهار له ۶ بجو څخه د ماښام تر ۶ بجو پورې د تګ راتګ لپاره تړلې وي. د چارواکو په وینا، له ګل کڅ څخه تر توی خلې او تنایي پورې، په ټانک کې له کوړ قلعه څخه تر خرګۍ او جنډولې پورې، له ټانک څخه جنوبي وزیرستان ته تلونکې لویه لار او د جنډولې بازار به په بشپړه توګه تړلي وي. همدارنګه له ډبرې څخه تر کوړ قلعه، ګرداوۍ او ګومل زام بند پورې لارې، په جنوبي وزیرستان اپر کې تر لده، مکین، تبۍ سر او بي بي رغزۍ پورې، او له کوټکۍ څخه تر سپینکۍ رغزۍ، نظرخېل او درګۍ پل پورې لارې به هم تړلې وي. له مډي جان څخه تر شین ورسک، مولا خان سرای او چګملایي څخه تر جنډولې پورې، همدارنګه له سرویکۍ څخه تر مولا خان سرای او بروند پورې سړکونه هم د تګ راتګ لپاره بند ساتل کېږي. چارواکو ویلي چې د ګرځبندیز پر مهال به یوازې د بیړني حالت په صورت کې د پولیسو یا امنیتي ځواکونو له اجازې وروسته د تګ راتګ اجازه وي. له خلکو غوښتنه شوې چې د امنیتي ځواکونو د لیدلو پر مهال خپل موټر لږ تر لږه ۵۰ متره مخکې ودروي.