ټرمپ یوازې د هرمز تنګي د بیا پرانیستلو په بدل کې له ایران سره د جګړې ختمولو ته تیار دی: وال سټریټ ژورنال

کوټه (ویب نیوز) امریکايي ورځپاڼې وال سټریټ ژورنال ادعا کړې چې د امریکا ولسمشر ډونلډ ټرمپ له ایران سره د روانې جګړې د پای ته رسولو لپاره د هرمز تنګي بشپړ بیا پرانیستل تر ټولو مهم شرط ګڼي. د امریکايي چارواکو په وینا، واشنګټن د ایران پر وړاندې خپل پوځي اهداف ترلاسه کړي او اوس یې پاملرنه د هرمز تنګي بیا پرانیستلو ته اړولې ده. د راپور له مخې، که تهران هرمز تنګی په بشپړه توګه بیا پرانیزي، امریکا ښايي د اټومي تړون له لاسلیک پرته هم له ایران سره د جګړې د پای ته رسولو او د اوسني اوربند د دوام پرېکړه وکړي. راپور زیاتوي چې ولسمشر ټرمپ باور لري ایران ته به د خپل اټومي پروګرام بیا فعالول اسانه نه وي، ځکه تېر جون د ایران درې مهم اټومي تاسیسات په پوځي بریدونو کې زیانمن شوي وو. امریکايي چارواکي وايي، که د ایران په اټومي پروګرام کې د پام وړ پرمختګ ونه لیدل شي او هرمز تنګی بیا پرانیستل شي، نو امریکا ښايي پر ایران خپل سمندري محاصره پای ته ورسوي او د اوربند د دوام لپاره زمینه برابره کړي. خو واشنګټن لا هم غواړي داسې ضمانتونه ترلاسه کړي چې ایران خپل اټومي پروګرام بېرته فعال نه کړي.