په کراچۍ کې پر پښتنو سوداګرو د پولیسو تشدد د غندنې وړ دی، پښتانه به یوازې پرېنږدو؛ زمرک اڅکزی

کوټه (ویب نیوز)د عوامي نېشنل ګوند پارلماني مشر انجینر زمرک خان اڅکزي په کراچۍ کې پر پښتنو سوداګرو د پولیسو له لوري د ادعا شوي تشدد، نیونو او د هغوی د شتمنیو د زیانمنولو پېښې په کلکه غندلې دي. نوموړي په خپل بیان کې ویلي چې په کراچۍ کې تر دې وړاندې هم له پښتنو سره د ورته پېښو راپورونه ورکړل شوي او عوامي نېشنل ګوند تل د دغو پېښو پر وړاندې غږ پورته کړی دی او په راتلونکي کې به هم پښتانه یوازې پرېنږدي. زمرک اڅکزي وویل چې پر پښتنو سوداګرو د پولیسو د تشدد او د هغوی د شتمنیو د زیانمنېدو راپورونه د جدي اندېښنې وړ دي، ځکه له هر وګړي سره د قانون خلاف چلند د منلو وړ نه دی او دا ډول پېښې په خلکو کې اندېښنه رامنځته کوي. نوموړي له د سندھ حکومت څخه غوښتنه کړې چې د پېښې سمدستي نوټس واخلي، د ادعا شوي تشدد او نیونو شفافې پلټنې وکړي او که پولیس چارواکي پکې ککړ ثابت شول، نو د قانون له مخې دې ورسره اقدام وشي. هغه وویل چې پښتانه د هېواد په اقتصاد او سوداګریزو فعالیتونو کې مهم رول لري او د هغوی د سر، مال او کاروبار ساتنه د ریاست او اړوندو حکومتونو مسؤلیت دی. زمرک اڅکزي ټینګار وکړ چې عوامي نېشنل ګوند به د پښتنو د حقونو د ساتنې او د هغوی پر وړاندې د هر ډول ناروا چلند پر ضد په ټولو اساسي او جمهوري فورمونو کې خپل غږ پورته کولو ته دوام ورکړي.