په کوټه کې د صفایۍ وضعیت خراب؛ د جراثیم ضد سپرې د نشتوالي له امله د ساري ناروغیو د خپرېدو اندېښنه

کوټه (ویب نیوز)د پښتونخوا ملي عوامي ګوند د کوټې ضلعې له لوري په خپاره شوي بیان کې ویل شوي چې په کوټه ښار کې د صفایۍ خراب وضعیت، د کثافاتو د ډېرو شویو ډکو ځایونو، د جراثیم ضد سپرې د نشتوالي او د کوڅه‌يي او لیونو سپیو د زیاتېدو له امله د ښاریانو ژوند له ستونزو سره مخ شوی او د روغتیايي بحران اندېښنې زیاتې شوې دي. په بیان کې ادعا شوې چې د اړوندو ادارو کمزوري فعالیت او اداري ناکامي د دې لامل شوې چې د صوبې مرکز له روغتیايي ستونزو سره مخ شي. ګوند ویلي چې د «صفا پروژې» د ښار د صفایۍ او د جامدو کثافاتو د مدیریت په برخه کې خپل اساسي هدف نه دی پوره کړی او د ښار ګڼ شمېر لویې لارې، بازارونه، استوګنیزې سیمې، د تعلیمي ادارو شاوخوا او کوڅې د کثافاتو په ډکو ځایونو بدلې شوې دي، په داسې حال کې چې په ګڼو سیمو کې د فاضله اوبو بهېدو له امله خلک په پلي تګ کې هم له ستونزو سره مخ دي. په بیان کې اندېښنه ښودل شوې چې د بارانونو او ګرم موسم پر مهال د مچانو، مچرو او نورو ناروغۍ خپروونکو حشراتو د مخنیوي لپاره د منظمې سپرې نه کېدو له امله د ملاریا، ډینګي، ګېسټرو او نورو ساري ناروغیو د خپرېدو خطر زیات شوی دی. همداراز د کوڅه‌يي او لیونو سپیو د زیاتېدو له امله هم اندېښنه ښودل شوې او ویل شوي چې په سړکونو، محلو، پارکونو، بازارونو او په ځانګړي ډول د ښوونځیو شاوخوا کې کوڅه‌يي سپي په ازاد ډول ګرځي او د سپیو د چیچلو پېښو په ځانګړي ډول د ماشومانو د والدینو اندېښنې زیاتې کړې دي. د ګوند په بیان کې د اړوندو ادارو هغه دریځ هم یاد شوی چې د سپیو د نیولو لپاره د روزل شوو کسانو، درملو، واکسینونو او نورو وسایلو له کمښت سره مخ دي. ګوند ویلي چې که ادارې رښتیا هم د وسایلو له کمښت سره مخ وي، حکومت باید سمدستي ورته اړینې بودیجې، بشري ځواک، وسایل او درمل برابر کړي. په بیان کې له حکومت، ضلعي ادارې، د کوټې میټروپولیټن کارپورېشن او د صفا پروژې له چارواکو غوښتنه شوې چې په کوټه کې د بېړني اقدام په توګه د صفایۍ پراخ کمپاین پیل کړي، د ښار له ټولو سیمو څخه کثافات ژر تر ژره پورته کړي او د مچرو او ناروغۍ خپروونکو حشراتو د له منځه وړلو لپاره منظم جراثیم ضد سپرې ترسره کړي. همداراز د کوڅه‌يي او لیونو سپیو د کنټرول لپاره د اغېزمن، خوندي او د بشري اصولو مطابق کمپاین د پیل غوښتنه شوې ده. په بیان کې ټینګار شوی چې د کوټې ښاریان د پاک، خوندي او روغتیايي چاپېریال په شرایطو کې د ژوند کولو اساسي حق لري او د حکومت ترڅنګ د ښار د پاک ساتلو په برخه کې د خلکو مسؤلیت هم مهم دی.