پښین (سید سردار محمد خوندئی)
د ایف سي نارتھ بلوچستان آئي جي میجر جنرل عاطف مجتبیٰ د پښین ریسټ هاوس ته راغی، چیرته چې د صوبايي اسمبلۍ غړي سردارزاده سید ظفر علي آغا او نورو معززو شخصیتونو یې تود هرکلی وکړ.
د پښین د نومورو شخصیتونو په استازیتوب پارلیماني غړي سردارزاده سید ظفر علي آغا د ایف سي نارتھ بلوچستان آئي جي سره ولیدل. د لیدنې په جریان کې سردارزاده سید ظفر علي آغا د بوستان سړک د بندیدو مسله د ایف سي آئي جي مخې ته کیښوده او هغه ته یې د خلکو له ستونزو څخه خبر کړ.
د سردارزاده سید ظفر علي آغا په ټینګار، د ایف سي نارتھ بلوچستان آئي جي میجر جنرل عاطف مجتبیٰ د بوستان سړک د سمدستي پرانستلو اعلان وکړ، چې دا د سیمې د خلکو لپاره یو مهم او د خوښۍ وړ پرمختګ دی.
په دې لیدنه کې د پښین ولسوالۍ د بیلابیلو سیمو اړوند د پښین جرګې مشران، حاجي علاؤالدین آغا، د انجمن تاجرانو، زمیندارانو، د پښین ولسوالۍ د جمعیت علماء اسلام امیرانو او منتظمینو، ملک لطیف الله ترین او نورو معززو مشرانو هم د ایف سي نارتھ بلوچستان له آئي جي سره ولیدل.
په دې موقع مشرانو د سیمې اوږدمهاله ستونزې، د امنیت وضعیت او د خلکو له ستونزو څخه آئي جي خبر کړ.
لیدنه په ډیر خوندور، سوله ایز او متقابل احترام فضا کې ترسره شوه، په کوم کې چې په سیمه کې د تلپاتې سولې، د خلکو د ستونزو د حل او د خلکو او ادارو ترمنځ د ښو اړیکو د ټینګښت په اړه په مهمو چارو تفصیلي خبرې اترې وشوې.
