بي این پي د سوراب د زړه بوږنوونکې پېښې پر وړاندې سختې اندېښنې څرګندې کړې

کوټه (وېب نیوز) د بلوچستان نېشنل پارټۍ مرکزي او صوبايي مشرانو په سوراب کې د رامنځته شوې زړه بوږنوونکې پېښې په اړه سخته اندېښنه او خواشیني څرګنده کړې او ویلي یې دي چې یو ځل بیا د معصومو ماشومانو او ښځو ژوندونه له لاسه ورکړل شوي، چې له امله یې د بلوچستان خلک له سختې رواني کړاو او وېرې سره مخ شوي دي. د ګوند مشرانو په ګډه خبري غونډه کې وویل چې په بلوچستان کې خلک د پرله‌پسې دردناکو پېښو له امله ستړي شوي او حکومت باید یوازې پر بیانونو او تورونو بسنه ونه کړي، بلکې عملي ګامونه پورته کړي. دوی وویل چې له هرې پېښې وروسته حکومت سمدستي د «فتنه ال هندستان» نوم اخلي، خو د پېښې اصلي حقایق د خلکو مخې ته نه راوړل کېږي. بي این پي غوښتنه کړې چې د سوراب د پېښې په ګډون د ورته ټولو پېښو د شفافې او بې پرې پلټنې لپاره دې یو بااختیاره کمېسیون جوړ شي، څو اصلي حقایق روښانه او د پېښو مسؤل کسان معلوم شي. په خبري غونډه کې د بلوچستان نېشنل پارټۍ مرکزي مشرانو ساجد ترین اېډووکېټ، اختر حسین لانګو، میر مقبول احمد لهړي، موسیٰ جان بلوچ، غلام نبي مري او نورو مشرانو ګډون کړی و. مشرانو غوښتنه وکړه چې په پېښه کې د وژل شویو کسانو کورنیو ته دې سمدستي مالي مرستې او هر ډول ممکنه ملاتړ ورکړل شي او په راتلونکي کې د ورته پېښو د مخنیوي لپاره دې اغېزمن او عملي اقدامات وشي. هغوی وویل چې د معصومو ماشومانو او ښځو وژل کېدل د سختې خواشینۍ او غندنې وړ دي او داسې ښکاري چې حکومت د خلکو د ځان او مال د ساتنې په برخه کې خپله دنده په سمه توګه نه ترسره کوي. د بلوچستان خلک نور د ناڅرګندتیا، وېرې او ناامنۍ حالت نه شي زغملی؛ حکومت باید جدي اقدامات وکړي، خلکو ته امنیت برابر کړي او د پېښو لاملونه او محرکات د ولس مخې ته کېږدي. د بي این پي مشرانو اعلان وکړ چې ګوند به د سوراب د پېښې پر ضد د اګست په ۱۶مه په کوټه او د بلوچستان په ټولو ضلعو کې احتجاجي مظاهرې وکړي. هغوی په خضدار کې د روان پرلت بشپړ ملاتړ هم اعلان کړ او ویې ویل چې ګوند د اغېزمنو کورنیو تر څنګ ولاړ دی او د هغوی د غوښتنو بشپړ ملاتړ به جاري ساتي.