کوټه، د مسلکي سوالګرو ډېرښت، ښاریانو سخت غبرګون ښودلی، د اقداماتو غوښتنه

کوټه(ویب نیوز) د بلوچستان په مرکز کوټه ښار کې د مسلکي سوالګرو د شمېر زیاتېدو ښاریان له سختو ستونزو سره مخ کړي دي. د ښار په ګڼ مېشتو بازارونو، سړکونو، څلورلارو او ترافیکي اشارو کې ګڼ شمېر نارینه، ښځینه او ماشومان د سوال کولو په حال کې لیدل کېږي. ښاریان وايي چې ځینې سوالګر په زوره پیسې غواړي، د موټرو کړکۍ ټکوي او ښځې او ماشومان د احساساتي فشار لپاره کاروي، په داسې حال کې چې د جېب وهلو، غلا او درغلیو په پېښو کې د ځینو مسلکي سوالګرو د ککړتیا شکایتونه هم شوي دي. سوالګر د ښار په لویو بازارونو، روغتونونو، عبادتځایونو او تعلیمي ادارو مخې ته هم راټولېږي چې له امله یې د خلکو او دوکاندارانو تګ راتګ له ستونزو سره مخ کېږي. ښاري حلقو د ضلعي ادارې او پولیسو پر چوپتیا پوښتنې راپورته کړې او له بلوچستان حکومت، د کوټې کمشنر او ډپټي کمشنر څخه یې غوښتنه کړې چې د مسلکي سوالګرو پر وړاندې دې سمدستي عملیات ترسره شي، منظمې ډلې دې وپېژندل شي او قانوني اقدام دې پرې وشي. همدارنګه دې هغه کسان چې ماشومان د سوال لپاره کاروي، د قانون له مخې مجازات شي او د ریښتینو مستحقو کسانو لپاره دې د مرستې او بیارغونې مرکزونه جوړ شي.