د شخصي ملکیت پر ځمکه د سرکاري ډیري فارم منصوبه د منلو وړ نه ده؛ بازۍ قبایل

کوټه (ویب نیوز)د بازۍ قبایلو معتبرو مشرانو او مخورو د کوټې تحصیل او ضلع، د موضع خشکابه ژور اغبرګ او ټپه نوحصار په سیمو کې د خپلو پلرنیو ځمکو په اړه د روانو شخړو، ادعا شویو تجاوزاتو او د کوټې ډویلپمنټ اتارټۍ له لوري د وړاندیز شوې سرکاري ډیري فارم منصوبې پر ضد بېړنۍ غونډه کړې ده. په غونډه کې د سیمې د ځمکو، ریونیو ریکارډ، عدالتي حکمونو او ادعا شویو بې‌نظمیو تفصیلي جاج واخیستل شو. له غونډې وروسته په ګډه اعلامیه کې وویل شول چې د یادې ځمکې په اړه د بلوچستان د بورډ آف ریونیو د مشر غړي مخې ته د ازخود نوټس په قضیه نمبر 06/2026/SMBR کې د ۲۰۲۶ کال د جون پر ۱۸مه حکم شوی او د ۲۰۲۴ کال د سیټلمېنټ ریکارډ د بیا ارزونې، د حدودو د تصدیق او د ریونیو سروې بهیر روان دی. قومي مشرانو وویل، تر هغه چې د ریونیو ریکارډ او د ځمکې د حدودو مسئلې په وروستي ډول نه وي حل شوې، په سیمه کې د نوې سرکاري یا سوداګریزې منصوبې پر مخ وړل مناسب نه دي. دوی وویل، په همدې ځمکه کې پخوا د جیو هاؤسنګ سکیم په نوم د یوې منصوبې وړاندیز شوی و، چې د منظوري او این او سي اړوندې مسئلې یې لا هم نه دي حل شوې، خو بیا هم د اعلانونو او د پلاټونو د خرڅلاو خبرونه خپاره شوي وو. مشرانو غوښتنه وکړه چې د دې معاملې بشپړه او بې‌طرفه پلټنه دې وشي او که د کوم شخص یا ادارې له لوري د قانون سرغړونه ثابته شي، نو د قانون له مخې دې کارروایي وشي. د بازۍ قبایلو په وینا، اوس پر همدې لانجمنې ځمکې د ډیري فارم منصوبه وړاندیز کېږي، چې دوی پرې جدي تحفظات لري. د سیمې جغرافیایي جوړښت او ناهمواره ځمکه په پام کې نیولو سره د منصوبې د تخنیکي او چاپېریالي مناسبت بې‌طرفه ارزونه ضروري ده. قومي مشرانو پوښتنه کړې چې که د ځمکې د ملکیت، ریونیو او حدودو مسئلې لا په بشپړه توګه روښانه نه وي، نو د کوم قانوني او انتظامي بنسټ له مخې پر دې ځمکه د منصوبې منظوري یا عملي پرمختګ کېږي؟ دوی د کیو ډي اې پر ځینو چارواکو او اړوندو افسرانو د ادعا شوې بدعنوانۍ، د واک د ناوړه استعمال او غیرشفافو پرېکړو تورونه هم لګولي او غوښتنه یې کړې چې د دغو تورونو د حقیقت معلومولو لپاره دې د یوه بې‌طرفه ادارې له لوري پلټنه وشي. قومي مشرانو څرګنده کړه چې د دوی موخه د پرمختیايي منصوبو مخالفت نه، بلکې د پلرنیو ځمکو، قانون، عدالتي حکمونو او عامه ګټو ساتنه ده. په اعلامیه کې ویل شوي چې په بلوچستان، په ځانګړي ډول کوټه کې د امن او امان وضعیت او قبایلي حساسیت ته په پام سره باید د ځمکو مسئلې په ډېر احتیاط او شفافیت حل شي او هېڅ لوري ته باید اجازه ورنه کړل شي چې قانون په خپل لاس کې واخلي یا پر لانجمنه ځمکه په زور پرمختګ وکړي. بازۍ قبایلو د بلوچستان هایکورټ له چیف جسټس، نېب، د بلوچستان انټي کرپشن اسټېبلېشمنټ او اړوندو لوړپوړو چارواکو څخه غوښتنه کړې چې د جیو هاؤسنګ سکیم، د این او سي مسئلو، د ځمکو د الاټمنټ، د وړاندیز شوې ډیري فارم منصوبې او د اړوندو افسرانو د کردار په اړه بې‌طرفه او د لوړې کچې پلټنې وکړي. دوی ټینګار کړی چې تر هغه چې د ریونیو ریکارډ، حدود او د ملکیت شخړې روښانه شوې نه وي، پر لانجمنه ځمکه دې د هر ډول منصوبې پرمختګ ودرول شي او ټول اقدامات دې د قانون او عدالتي حکمونو له مخې ترسره شي.