په بلوچستان کې د ټرانسپورټ څانګه د تباهۍ له ګواښ سره مخ ده؛ حبیب الله بادیزي

کوټه (ویب نیوز)د آل بلوچستان ټرانسپورټرانو ایکشن کمېټې مشر حاجي حبیب الله خان بادیزي ویلي، چې په بلوچستان کې د ټرانسپورټ څانګه اوس د بشپړې تباهۍ تر درشل رسېدلې او د صوبې د ملي لویو لارو خراب حالت، د امن او امان ستونزې، غیر ضروري خنډونه او نورو مشکلاتو ټرانسپورټر له سخت اقتصادي بحران سره مخ کړي دي. نوموړي له حکومت څخه غوښتنه کړې چې ټرانسپورټرانو ته دې سمدستي ځانګړی ریلیف پکېج اعلان کړي. هغه په کوټه کې له خبریالانو سره د خبرو پر مهال وویل، د بلوچستان پر ملي لویو لارو سفر د ټرانسپورټرانو او مسافرو دواړو لپاره ډېر ستونزمن شوی، د اوږدو سفرونو پر مهال د سړکونو خراب حالت، په بېلابېلو ځایونو کې خنډونه او نورې ستونزې نه یوازې موټرو ته زیان رسوي، بلکې د ټرانسپورټرانو لګښتونه یې هم څو چنده زیات کړي دي. حبیب الله بادیزي وویل، د ډیزلو، د موټرو د پرزو، ټایرونو، ترمیم او نورو لګښتونو پرله‌پسې زیاتوالي د ټرانسپورټ کاروبار سخت اغېزمن کړی، بلخوا د مسافرو د پېرلو توان کم شوی او ټرانسپورټران هم نه شي کولی په کرایو کې له حده زیاتوالی راولي، چې له امله یې د عاید او لګښت ترمنځ توازن ساتل ورځ تر بلې ناممکن کېږي. هغه وویل، ټرانسپورټرانو د هېواد د اقتصاد او په بلوچستان کې د ولس لپاره د سفري اسانتیاوو برابرولو په موخه میلیاردونه روپۍ پانګونه کړې، خو اوس دا څانګه له سختو مالي ستونزو سره مخ ده. د نوموړي په وینا، ډېری ټرانسپورټران د موټرو د قسطونو له امله له کمپنیو سره د کروړونو روپیو پوروړي شوي او که اوسنی وضعیت دوام وکړي، نو ډېر ټرانسپورټران به اړ شي چې خپل موټرونه له سړکونو لرې کړي. هغه زیاته کړه چې له ټرانسپورټ سره تړلي زرګونه ډرېوران، کنډکټران، مېخانیکان، کلینران او نور مزدوران هم له دې بحران څخه مستقیم اغېزمنېږي او د ټرانسپورټ ستونزه په اصل کې د میلیونونو کسانو د روزګار ستونزه ده. حبیب الله بادیزي وویل، ټرانسپورټران اوس د شپې د ډوډۍ لپاره هم له سختو ستونزو سره مخ دي او د موټرو د لګښتونو، قسطونو او نورو واجباتو ورکول ورته سخت شوي دي. نوموړي له حکومت څخه غوښتنه وکړه چې یوازې پر ډاډ ورکولو بسنه ونه کړي، بلکې عملي ریلیف ورکړي، د بلوچستان ملي لویې لارې دې سمدستي ترمیم او بحالې کړي، ټرانسپورټرانو ته دې ځانګړی مالي ریلیف ورکړل شي، د موټرو د قسطونو په ورکولو کې دې اسانتیاوې برابرې شي، پر مالیاتو او نورو واجباتو دې مناسبه رعایت ورکړل شي او د ټرانسپورټ څانګې د نورو ستونزو د حل لپاره دې بېړني اقدامات وشي. هغه وویل، د آل بلوچستان ټرانسپورټرانو ایکشن کمېټه به د ټرانسپورټرانو د قانوني حقونو او ستونزو د حل لپاره خپله مبارزه روانه ساتي او که حکومت پر وخت عملي اقدامات ونه کړي، نو ټرانسپورټران به د راتلونکي لائحې اعلانولو ته اړ شي.