ډاډر کې د چاودنې له امله زیانمنه شوې د ګاز پایپ لاین تر ۶ ورځو وروسته هم نه دی رغول شوی

کوټه (ویب نیوز)د کچهي ضلعې د ډاډر ښار ترڅنګ د چاودنې له امله زیانمن شوې د ۱۸ انچه قطر سوئي ګاز پایپ لاین د پېښې شپږ ورځې وروسته هم د ترمیم کار نه دی پیل شوی، چې له امله یې د بلوچستان په ګڼو ضلعو کې د ګاز رسونه سخته اغېزمنه شوې ده. د سوئي سدرن ګاز کمپنۍ چارواکو په وینا، د اګست پر ۱۲مه د ډاډر ترڅنګ د چاودنې له امله د ۱۸ انچه قطر ګاز پایپ لاین زیانمن شوی و، خو د زیانمنې شوې کرښې د بېرته فعالولو لپاره د ترمیم اړین کار لا هم نه دی پیل شوی، ځکه ضلعي انتظامیې د ترمیم کوونکو ډلو ته امنیتي کلیئرنس نه دی ورکړی. د ګاز پایپ لاین د ترمیم په ځنډ سره مستونګ، قلات، پشین، زیارت او مچ ته د ګاز رسونه بنده ده، په داسې حال کې چې د کوټې په سریاب، ختیځ بای پاس او کچلاک سیمو کې د ګاز کم فشار او بندېدو د خلکو ستونزې نورې هم زیاتې کړې دي. ښاریان وایي چې له څو ورځو راهیسې د ګاز د بندښت له امله کورني کارونه سخت اغېزمن شوي او د اړوندو ادارو له خوا د ګاز د بحالۍ په برخه کې ځنډ د خلکو ستونزې لا پسې جدي کړې دي. د سوئي سدرن ګاز کمپنۍ چارواکو ویلي چې د امنیتي کلیئرنس له ترلاسه کېدو وروسته به د زیانمن شوي پایپ لاین د ترمیم کار پیل شي.