کوټه: مهمې لویې لارې په تیاره کې ډوبې؛ د سړک څراغونو خرابوالی د ادارې پر فعالیتونو پوښتنې راپورته کوي

کوټه (ویب نیوز)د بلوچستان صوبایي مرکز کوټه په جناح روډ، شارع اقبال او نورو مهمو او مصروفو سړکونو کې د سړک څراغونو د خرابوالي له امله ښاریان د شپې پر مهال له سختو ستونزو سره مخ دي، چې ورسره د ترافیکي پېښو او امنیتي پېښو اندېښنې هم زیاتې شوې دي. د ښاریانو په وینا، د ښار په ګڼو سړکونو او کوڅو کې له اوږدې مودې راهیسې سټریټ لایټونه خراب دي، چې له امله یې پلي تګ کوونکي، ښځې، سپین ږیري او موټرسایکل سپرو ته ستونزې پېښېږي او په تیاره سړکونو کې د ټرافیکي پېښو خطر هم زیات شوی دی. ښاریان وایي چې د صوبایي مرکز په مهمو او مرکزي سیمو کې د سړک څراغونو خرابوالی د اړوندو ادارو د فعالیتونو په اړه جدي پوښتنې راپورته کوي. د جناح روډ او شارع اقبال په څېر مهمو لارو کې د مناسبې رڼا نشتوالی په ځانګړي ډول د اندېښنې وړ دی، ځکه چې پر دغو سړکونو شپه او ورځ د خلکو د تګ راتګ لړۍ روانه وي او تیاره سیمې د جرمونو د پېښو لپاره هم زمینه برابرولی شي. ښاریانو له د بلوچستان له اعلی وزیر، د کوټې له ایډمنسټرېټر او اړوندو لوړپوړو چارواکو غوښتنه کړې چې د سړک څراغونو د خرابوالي موضوع په بیړني ډول وڅېړي، د ټول ښار د خرابو سټریټ لایټونو سروې ترسره کړي او ټول څراغونه دې ژر تر ژره فعال کړي. د ښاریانو په وینا، یوازې پر کاغذي اقداماتو بسنه نه ده پکار، بلکې د سټریټ لایټونو د دوامدارې ساتنې او ترمیم لپاره دې هم اغېزمن او مستقل نظام جوړ شي، څو د ښار مهمې لارې او استوګنیزې سیمې تل روښانه او خوندي پاتې شي.