سریاب روډ او شاوخوا سیمو کې د برېښنا سخت لوډشیډنګ؛ ښاریان له ستونزو سره مخ

کوټه (ویب نیوز)د سریاب روډ، کلی کمالو، بیډا، رند چوک او شاوخوا سیمو کې د برېښنا اعلان شوي او غیر اعلان شوي لوډشیډنګ د ښاریانو ژوند سخت کړی او په سخته ګرمي او خفګان کې د برېښنا پرله‌پسې بندېدو خلک له سختو ستونزو سره مخ کړي دي. د سیمې اوسېدونکي وايي، د برېښنا اوږده او نامعلومه بندېدنه د کورني ژوند، کاروبار او ورځنیو چارو پر وړاندې ستر خنډ ګرځېدلې ده. د هغوی په وینا، کله چې یو ساعت برېښنا راشي، ورپسې تر یوه ساعت پورې بنده وي، چې له امله یې په ګرمي کې خلک له سخت عذاب سره مخ دي. د برېښنا د سترګو پټولو له امله د زده‌کوونکو زده کړې، د دوکاندارانو کاروبار او کورني کارونه اغېزمن شوي، په داسې حال کې چې د برېښنا د بندېدو پر مهال د مچانو او مچرو زیاتوالي ستونزې لا پسې زیاتې کړې دي. ښاریان وايي، په ځانګړي ډول د شپې له خوا د برېښنا پرله‌پسې بندېدو له امله ماشومان، سپین ږیري او ښځې له سختې ستونزې سره مخ کېږي او د مچرو د زیاتوالي له امله د ملاریا او نورو مچرو له لارې د خپرېدونکو ناروغیو د زیاتېدو وېره هم شته. د سیمې اوسېدونکو د کیسکو چارواکو او اړوندې ادارې څخه غوښتنه کړې چې د سریاب روډ، کلی کمالو، بیډا، رند چوک او شاوخوا سیمو غیر اعلان شوي لوډشیډنګ ته دې سمدستي پام وکړي، په ځانګړي ډول د شپې اوږد او غیر ضروري لوډشیډنګ دې پای ته ورسوي او د برېښنا دوامداره رسونه دې یقیني کړي. دوی ټینګار کړی چې په سخته ګرمي کې د برېښنا دوامداره بندېدل له عذاب څخه کم نه دي او حکومت او اړوند ادارې باید د اعلان شوي لوډشیډنګ مهال‌وېش په کلکه عملي او خلکو ته اسانتیاوې برابرې کړي.