د اقتصادي ثبات لپاره دې پاکستان یوتھ فارن انویسټمنټ کونسل جوړه شي. اسد شمیم

کوټه(ویب نیوز) پاکستانی الاصله برتانوي سوداګر، د فرنیچر اِن فیشن بنسټګر او چیف ایګزیکټیو او د او ایم انټرنیشنل د مشورتي بورډ مشر اسد شمیم وړاندیز کړی چې د پاکستان د اقتصادي پرمختګ او د هېواد د ځوانانو د نړیوالو فرصتونو سره د نښلولو لپاره دې د «پاکستان یوتھ فارن انویسټمنټ کونسل» جوړه شي. نوموړي ویلي، پاکستان باید د «برېن ډرېن» پر ځای «برېن ګېن» ته مخه کړي، ځکه هېواد د وړتیا، هوډ او سوداګریزې جذبې له کمښت سره نه دی مخ، بلکې اړتیا دا ده چې د ځوانانو او په نړیواله کچه د موجودو فرصتونو ترمنځ پیاوړی تړاو رامنځته شي. اسد شمیم ویلي چې د یادې شورا موخه به د پاکستان ځوان سوداګر له نړیوالې پانګې، ټکنالوژۍ، مهارتونو او نړیوالو بازارونو سره نښلول وي. نوموړي زیاته کړې چې پاکستان دوه سترې شتمنۍ لري؛ ځوانان او په بهرنیو هېوادونو کې مېشت پاکستانیان، چې په برېتانیا، متحده عربي اماراتو، منځني ختیځ، اروپا، شمالي امریکا او اسټرالیا کې یې بریالي کاروبارونه، مسلکي تجربې او نړیوالې اړیکې جوړې کړې دي. د ده په وینا، د بهر مېشتو پاکستانیانو رول باید یوازې تر رالېږل شوو پیسو محدود نه وي، بلکې هغوی کولی شي په پانګونه، لارښوونه، ټکنالوژۍ، مشارکت او نړیوالو بازارونو ته د لاسرسي په برخه کې د پاکستان ملاتړ وکړي. اسد شمیم وویل چې پاکستان یوتھ فارن انویسټمنټ کونسل کولی شي د باور وړ او شفاف پل جوړ کړي، چې د پاکستان د ځوانو او بااستعداده سوداګرو کاروبارونه له بهر مېشتو پاکستانی پانګه‌والو، فېملي دفترونو، وینچر کېپیټل، څو ملتي شرکتونو او نړیوالو ستراتیژیکو شریکانو سره ونښلوي. نوموړي زیاته کړې چې په برېتانیا کې یې د هغې مبارزې برخه هم اخیستې وه چې د ۱۹۲۹ کال د هغو مقرراتو په بدلون کې یې مرسته وکړه، چې د شکر ناروغۍ لرونکو مسلکي سوک وهونکو د مسلکي باکسینګ جواز اخیستل یې محدود کړي وو. هغه ویلي چې د همدې عزم له مخې غواړي د پاکستان د راتلونکي نسل لپاره د فرصتونو په رامنځته کولو کې خپل رول ولوبوي او خپل نړیوال کاروباري تجربه، اړیکې او شبکې د پاکستان لپاره د نویو فرصتونو د دروازو پرانیستلو په موخه وکاروي. اسد شمیم خپل لید داسې بیان کړی چې پاکستان باید له د وړتیاوو د وتلو څخه د وړتیاوو د جذب پر لور، له حواله شوو پیسو څخه د پانګونې پر لور او له پاکستاني استعدادونو څخه د نړیوالو کاروباري ادارو پر لور حرکت وکړي او د هېواد د ځوانانو او بهر مېشتو پاکستانیانو ترمنځ د باور وړ او شفافه اړیکه رامنځته کړي.