کوټه کې د ګاز بحران سخت شوی، په ۲۴ ساعتونو کې یوازې ۷ ساعته ګاز ورکول کېږي. کاشف حیدري

کوټه(ویب نیوز) د بلوچستان د مرکزي سوداګرو تنظیم ویاند کاشف حیدري ویلي چې په کوټه کې د ګاز رسونې وخت نور هم کم شوی او اوس په ۲۴ ساعتونو کې یوازې ۷ ساعته ګاز ورکول کېږي، چې د خلکو سره ښکاره بې‌انصافي ده، په داسې حال کې چې د ښار په ګڼو سیمو کې ګاز په بشپړه توګه بند دی او ښاریان له سختو ستونزو سره مخ دي. نوموړي په یوه غونډه کې د وینا پر مهال وویل چې د ګاز پرله‌پسې بندښت او کم فشار د کورنیو ترڅنګ د هوټلونو، رستورانتونو، تنورونو او نورو کاروباري مرکزونو ستونزې هم زیاتې کړې دي او سوداګرو ته درانه مالي زیانونه اوړي. د هغه په وینا، د ژمي او سړې هوا پر مهال ښاریان له وړاندې د کم فشار او غیراعلاني بندښت له ستونزې سره مخ دي، خو په داسې حالت کې د ګاز د رسونې وخت نور کمول خلک له یوې بنسټیزې اسانتیا څخه محرومول دي. هغه وویل چې په ډېرو سیمو کې حتی د ټاکل شوو وختونو پر مهال هم ګاز نه وي او په ځینو سیمو کې په بشپړه توګه ورک دی، چې له امله یې د کورونو بخارۍ او چولۍ سړې دي، ښځې د خوړو په پخولو کې له ستونزو سره مخ دي او خلک د بدیلو سون توکو کارولو ته اړ شوي چې ورسره د کورنیو لګښتونه هم زیات شوي دي. کاشف حیدري وویل چې د خلکو له پرله‌پسې شکایتونو او احتجاجونو سره سره د اړوند ګاز شرکت له لوري د ستونزې د دایمي حل لپاره اغېزمن ګام نه دی اخیستل شوی. نوموړي غوښتنه وکړه چې په کوټه کې دې ټولو سیمو ته د مناسب فشار سره بې‌خنډه ګاز رسول یقیني شي، د کم فشار او بشپړ بندښت ستونزه دې ختمه او د ګاز د رسونې د وخت کمولو پرېکړه دې بېرته واخېستل شي. هغه خبرداری ورکړ چې که د خلکو دې جدي ستونزې ته سمدستي پام ونه شي، سوداګره ټولنه به له ولس سره یوځای د احتجاج کولو ته اړ شي.