د بلوچستان د روغتیايي څانګې ښه والی لومړیتوب دی

کوټه (ویب نیوز) — د بلوچستان د روغتیا وزیر بخت محمد کاکړ ویلي، په صوبه کې د روغتیايي څانګې ښه والی د حکومت له مهمو لومړیتوبونو څخه دی او په روغتونونو کې د اسانتیاوو د کمښت د ختمولو او ناروغانو ته د غوره درملنې برابرولو لپاره پر بېړنۍ کچه اقدامات روان دي. نوموړي له بېلابېلو پلاوو سره په خبرو کې وویل، د بلوچستان ولس له کلونو راهیسې د بنسټیزو روغتیايي اسانتیاوو له کمښت سره مخ دی او حکومت هڅه کوي چې دغه محرومۍ پای ته ورسوي او د صوبې هر وګړي ته د هغه تر دروازې پورې غوره روغتیايي خدمات برابر کړي. هغه وویل، د لویو روغتونونو ترڅنګ کلیوالي روغتیايي مرکزونه هم په عصري اسانتیاوو سمبالېږي، د ډاکټرانو او طبي کارکوونکو د کمښت د پوره کولو لپاره د ګمارنې بهیر پیل شوی او د درملو د برابرولو لپاره شفاف نظام جوړېږي. وزیر زیاته کړه، د روغتیايي بیمې پروګرام ساحه به نوره هم پراخه شي، څو بېوزله او مستحقې کورنۍ له وړیا درملنې ګټه واخلي. نوموړي وویل، د مور او ماشوم روغتیا، واکسیناسیون او بیړنیو خدماتو د ښه والي لپاره ځانګړي اقدامات کېږي او په روغتیايي څانګه کې د اصلاحاتو له لارې به د فساد او بدعنوانۍ ټولې لارې وتړل شي. د هغه په وینا، د ولس د باور بېرته ترلاسه کول اصلي بریا ده او د دې لپاره به عملي اقدامات ډېر ژر ترسره شي.