په ټول هېواد کې برېښنا نوره هم ګرانه شوه، پر مصرفوونکو ۱۲ اربه او ۶۷ کروړه روپۍ اضافي بار

کوټه (ویب نیوز) په ټول هېواد کې برېښنا نوره هم ګرانه شوې او د درې میاشتني تعدیل له مخې د برېښنا په بیه کې په هر یونټ ۵۲ پېسې زیاتوالی شوی چې له امله به یې پر مصرفوونکو ۱۲ اربه او ۶۷ کروړه روپۍ اضافي بار ولګېږي. د نېپرا د خبرتیا له مخې دا زیاتوالی د روان کال د دویمې ربعې د درې میاشتني تعدیل له مخې شوی او د سپټمبر، اکتوبر او نومبر په برېښنا بلونو کې به له مصرفوونکو څخه ترلاسه کېږي. له مصرفوونکو به درې میاشتې هره میاشت په هر یونټ ۵۲ پېسې اضافي اخیستل کېږي او د دې زیاتوالي پلي کېدل د کې الېکټریک په ګډون د ټول هېواد پر مصرفوونکو کېږي. نېپرا تر دې وړاندې د درې میاشتني تعدیل منظوري ورکړې وه او د وفاقي حکومت له منظورۍ وروسته یې د زیاتوالي رسمي خبرتیا خپره کړې ده.