په بلوچستان کې به هېڅ دنده ونه پلورل شي؛ ثابتېدو په صورت کې به د وزیر او سیکرټري پر وړاندې اقدام کېږي؛ سرفراز بګټي

کوټه (ویب نیوز)د بلوچستان وزیراعلیٰ میر سرفراز بګټي څرګنده کړې چې په صوبه کې به د هېڅ ځوانه دنده ونه پلورل شي او د سرکاري دندو پېر او پلور په هېڅ صورت د منلو وړ نه دی. نوموړي وویل چې له لومړۍ ورځې یې دریځ روښانه دی چې په بلوچستان کې به هېڅ دنده خرڅه نه شي او د کابینې غړي، چیف سیکرټري او ټول اړوند چارواکي هم پر همدې دریځ متفق دي. وزیراعلیٰ د سیکرټریانو د کمېټې د غونډې مشري وکړه او د محکمو د فعالیتونو د جاج پر مهال یې د ځنګلاتو په محکمه کې د ګمارنو په اړه د بې نظمۍ د شکایتونو په اړه د لوړې کچې تحقیقاتو امر وکړ. سرفراز بګټي وویل، که په هره محکمه کې د دندو د پلورلو کره ثبوتونه مخې ته راغلل، نو د اړوندې محکمې وزیر او سیکرټري به په خپلو دندو پاتې نه شي. هغه زیاته کړه چې که په بې پرې تحقیقاتو کې د کوم کس جرم ثابت شو، نو هېڅوک به له سزا څخه بچ نه شي. نوموړي وویل چې د بلوچستان ځوانانو ته د میرټ او شفافیت پر بنسټ د روزګار فرصتونه برابرول د حکومت مسوولیت دی او په سخته یخنۍ او ګرمۍ کې د روزګار په تمه د ځوانانو دندو خرڅول هېڅ صورت د منلو وړ نه دي. وزیراعلیٰ له چارواکو څخه په دې اړه لوړه هم واخیسته چې د سرکاري دندو د پېر او پلور اجازه به نه ورکوي او د ګمارنې په بهیر کې به میرټ، شفافیت او ټول قوانین او اصول په بشپړ ډول عملي کوي.