د خاران تخنیکي روزنیز مرکز د بشپړ فعالولو هوکړه، نوي مسلکي کورسونه پیلېږي

کوټه (ویب نیوز) د بلوچستان د مالیې صوبايي وزیر میر شعیب نوشیرواني د بلوچستان تخنیکي زده کړو او مسلکي روزنې ادارې (بي ټیوټا) له دفتر څخه لیدنه وکړه او د ادارې له مشر عبدالکبیر زرکون سره یې ولیدل. په دې لیدنه کې د صوبې په کچه د روانو تخنیکي او مسلکي روزنیزو پروګرامونو او راتلونکې تګلارې په اړه معلومات ورکړل شول. د خاران تخنیکي روزنیز مرکز د بشپړ فعالولو او د سیمې د اړتیاوو له مخې د نویو مسلکي څانګو د جوړولو هوکړه وشوه. میر شعیب نوشیرواني وویل، د بلوچستان د وزیراعلیٰ د لارښوونې له مخې به ځوانانو ته عصري او معیاري تخنیکي زده کړې ورکړل شي او د هغوی لپاره به د کار زمینه برابره شي. هغه زیاته کړه چې د خاران د ځوانانو د ځان‌روزګارۍ لپاره به د کاروباري روزنې ترڅنګ د قرض حسنه سکیم هم معرفي شي. د بي ټیوټا مشر ډاډ ورکړ چې د بازار د اړتیاوو له مخې به نور عصري روزنیز کورسونه هم پیل شي، څو ځوانانو ته په هېواد دننه او بهر د کار غوره فرصتونه برابر شي.