فضل الرحمان د حکومت او تحریک انصاف ترمنځ د منځګړیتوب رول نه لوبوي، سلمان اکرم راجا

کوټه (ویب نیوز) د پاکستان تحریک انصاف عمومي منشي سلمان اکرم راجا ویلي چې مولانا فضل الرحمان د تحریک انصاف او حکومت ترمنځ د منځګړي رول نه لوبوي، خو له ټولو سره خبرې کوي او په دې کې هېڅ ستونزه نشته. نوموړي په یوه ټلوېزیوني خپرونه کې وویل چې د خیبر پښتونخوا اعلیٰ وزیر سهیل افریدي د صوبايي اسمبلۍ د غړو په رایو ټاکل شوی او د هغه پر ضد درخواست بې بنسټه دی. سلمان اکرم راجا وویل چې د تحریک انصاف بنسټګر له سیاسي ډګر څخه نه شي ایستل کېدای او د هېواد د مهمو پرېکړو لپاره په سیاسي خبرو کې د هغه شاملول ضروري دي. هغه زیاته کړه چې لانګ مارچ یو سیاسي بهیر او اساسي حق دی، په داسې حال کې چې د خیبر پښتونخوا اعلیٰ وزیر د صوبې د اساسي حقوقو لپاره مبارزه کوي.